O fiscal superior de Galicia anima ás vítimas de abusos sexuais na Igrexa a denunciar
Fernando Suances data para antes do verán a celebración do xuízo polo accidente ferroviario de Angrois.
Por Europa Press / Redacción | SANTIAGO DE COMPOSTELA | 27/02/2022 | Actualizada ás 18:56
O fiscal superior de Galicia, Fernando Suances, animou ás vítimas de abusos sexuais na Igrexa a denunciar os feitos e asegurou que contarán co apoio do organismo no proceso.
Nunha entrevista concedida a Cadena SER Galicia este domingo e recollida por Europa Press, Suances explicou que, a requirimento da Fiscalía Xeral, todos os organismos autonómicos enviaron datos sobre os procesos actualmente en trámite a este respecto.
A galega remitiu sete denuncias, pero Suances matizou que é o dato final posto que "quedan fóra deste estudo" todos os casos onde xa houbo sentenzas condenatorias, "todo o que se tramitou no ámbito relixioso e que non pasase á xurisdición penal", e sobre todo, "unha parte moi relevante relativa ás vítimas que non denunciasen".
O fiscal superior tamén se referiu á deriva xudicial do afundimento da 'Villa de Pitanxo', concretamente ás declaracións de falecemento dos desaparecidos, onde intervén a Fiscalía.
Segundo explicou, para este caso, a declaración xa se pode realizar aos oito días e é vital para todo o que ten ver con pensións e dereitos sucesorios. Suances asegurou que a Fiscalía de Vigo abriu xa dilixencias nesta materia para axilizar o caso o máximo posible.
A este respecto, e aínda que non concretou prazos, sinalou que o organismo competente sería un xulgado de primeira instancia de Vigo, "de onde saíu o barco para pescar".
En canto á posible apertura dunha investigación polas causas do naufraxio, declarou que, na súa opinión, sería competencia da Audiencia Nacional.
XUÍZO POLO ACCIDENTE DE ANGROIS
Por outra banda, o máximo responsable da Fiscalía avanzou que o xuízo polo accidente ferroviario de Angrois podería celebrarse antes do verán no Palacio de Congresos de Santiago. Sobre este proceso, Suances tamén confía en que se faga "ben", posto que Galicia conta con experiencia en 'macrocausas' como foi a do Prestige, entre outras.
Por último, o fiscal superior confirmou que se celebrará un acto en marzo para conmemorar o 40º aniversario da Fiscalía de Galicia, ao que asistirá ademais a Fiscal Xeral do Estado.
O obxectivo, comentou, será "visibilizar" o funcionamento do organismo, desde o que insisten en "ser peza fundamental na investigación penal"; así como "desenvolver e visibilizar" o traballo das Fiscalías especializadas.
