A Xunta cambia o concurso-oposición pola oposición libre en 720 prazas de emprego público

A Xunta de Galicia anunciou este martes que proporá aos sindicatos unha convocatoria de 720 prazas de emprego público a través do sistema de oposición libre. Con esta medida, o Executivo galego modifica o sistema empregado ata agora e cambia o concurso-oposición por oposición libre.

Nun comunicado, o Goberno autonómico explicou que o cambio afecta as propostas de bases de convocatoria de 20 escalas profesionais que a Dirección Xeral da Función Pública remitiu ás organizacións sindicais para a súa negociación. Estas prazas pertencen ás Ofertas de Emprego Público (OEP) do ano 2019, 2020 e 2021.

A estas oposicións poderá presentarse calquera persoa que cumpra os requisitos esixidos nas convocatorias, segundo indica a Xunta, as súas posibilidades de lograr unha praza dependerán exclusivamente da preparación e do esforzo realizado polos aspirantes no proceso selectivo. Por tanto, non haberá unha fase de concurso na que se valoren os méritos de experiencia profesional ou a formación.

Do total de prazas, máis de 540 serán para o acceso ás principais escalas da Administración Xeral, entre as que destacan 75 para o Corpo superior A1, 90 prazas para o Corpo de xestión A2, 102 para o Corpo administrativo C1, 120 prazas para o Corpo auxiliar C2, 119 para a Agrupación Profesional (AP) de persoal funcionario e oito para a Escala Técnica de Finanzas A2. Tamén se recollen cinco prazas para o Corpo auxiliar e 28 de Agrupación Profesional reservadas para persoas con discapacidade intelectual.

Oposicións á Xunta no recinto de Amio, en Santiago de Compostela | Fonte: XUNTA.