Concentración diante de San Caetano de CIG ensino demandando a cobertura de baixas en centros educativos
O sindicato denuncia ademais que esta situación se fai aínda máis grave porque a Consellería chama dous días á semana --martes e venres--, "co que moitas baixas que serían cubertas, aínda coas limitacións impostas pola Administración, non son cubertas".
Por E.P. | SANTIAGO DE COMPOSTELA | 16/03/2022 | Actualizada ás 17:41
Delegados de CIG-Ensino concentráronse este mércores fronte á sede da Xunta de Galicia, en San Caetano, para solicitar a cobertura de todas as baixas en centros educativos. Segundo explicou o sindicato, desde comezos de mes están a borrarse "todos os días" unha media de máis de 20 baixas solicitadas polos centros educativos da plataforma na que se actualizan.
En concreto, aseguran que se eliminan todas as baixas que non superen os 10 días. "Fai falta lembrarlle á Consellería que se un equipo directivo sobe unha vacante é porque a necesita, polo que está a vulnerar o lexítimo dereito do alumnado e do centro educativo a recibir a atención que necesitan", defenderon.
Así, explican por exemplo que, na mañá deste martes (entre as 9,00 e as 12,00 horas) producíronse 41 vacantes no corpo de mestras, "das cales adxudicaron 13, borraron outras 13 e 15 aínda seguían pendentes". En Secundaria, continúan, de 26 vacantes que había ás 10,00 horas, adxudicaron 10 e quedaban pendentes 5 ás 13,00 horas, "polo que as outras 11 desapareceron nese tres horas".
O sindicato denuncia ademais que esta situación se fai aínda máis grave porque a Consellería chama dous días á semana --martes e venres--, "co que moitas baixas que serían cubertas, aínda coas limitacións impostas pola Administración, non o son, xa que cando chega o día do chamamento xa pasaron demasiados días desde que os centros subiron a necesidade desa substitución". Opérase así, asegura CIG-Ensino "para non facer un nomeamento por uns poucos días e aforrar custos en persoal que é o fin último deste xeito de actuación".
Sinalaron ademais que con estas prácticas "non se cumpren as medidas anti-covid". "Desaparecen, por exemplo, os grupos burbulla, xa que o profesorado de garda ten que pasar por numerosas aulas, situación que se agrava aínda máis no ensino infantil e en educación especial xa que en moitos casos o alumnado ou non leva máscaras ou non as leva ben colocadas", explican.
PIDEN UNHA RECTIFICACIÓN URXENTE
É por isto que a CIG solicita que as vacantes en educación especial ou de atención a alumnado con NEAE cúbranse no mesmo día, así como unha "rectificación urxente" na política de coberturas en xeral e que os chamamentos se fagan todos os días.
Así mesmo, animaron aos centros educativos a que sigan subindo todas as vacantes que necesiten, "mesmo que as volvan a subir despois de que llas borren".
