Accidente laboral: feridos dous traballadores na refinaría de Repsol na Coruña
O sinistro debeuse a un escape controlado que non supón un risco para a poboación
Por Europa Press / Redacción | A CORUÑA | 26/03/2022 | Actualizada ás 14:44
Dous traballadores da refinaría de Repsol na Coruña foron trasladados ao Complexo Hospitalario Universitario da Coruña (Chuac) por mor dun accidente laboral na refinaría da Coruña.
Segundo a información facilitada ao 112 Galicia, o sinistro está vinculado cun escape "controlado e illado" --remarca o servizo de emerxencias-- nunha zona da planta que estaba nunha parada técnica programada. Ademais, o 112 asegura tamén que non existe risco para a poboación.
O Centro Integrado de Atención ás Emerxencias (CIAE) 112 Galicia foi informado o suceso preto das 11,15 horas, polos servizos de emerxencias da industria, quen mobilizou a un equipo interno de seguridade para atender os afectados.
MEDIOS MOBILIZADOS
Desde o 112 Galicia alertouse a Urxencias Sanitarias de Galicia-061, que mobilizou a un equipo de profesionais para atender aos traballadores feridos. Tamén, un técnico de Protección Civil da Xunta Galicia desprazouse ata ao lugar.
INVESTIGACIÓN DE REPSOL
Tras o ocorrido, Repsol emitiu un comunicado no que confirman o accidente e que os dous traballadores pertencen a unha empresa auxiliar. Asegura que lamenta profundamente o sucedido e espera a pronta recuperación dos feridos. Ademais, está "en permanente contacto coa empresa auxiliar" para ofrecerlles "todo o seu apoio".
Tamén indica que foron informadas as autoridades competentes e que a compañía abriu unha investigación para aclarar as causas do accidente.
