O BNG presentará alegacións ao proxecto do parque eólico Monte Neme porque "provocaría danos irreparables"

O BNG anunciou que presentará alegacións ao proxecto do parque eólico Monte Neme, no límite entre os concellos coruñeses de Carballo e Malpica de Bergantiños porque consideran que provocaría "danos irreparables". Deste xeito, convidan tamén a ambos os concellos a unirse e a "seguir o camiño aberto" por diferentes asociacións e polos veciños directamente afectados.

Os nacionalistas denunciaron que o novo parque obrigaría a cambiar os usos do chan, coa consecuente perda de valor e afectaría á vida diaria de moitos veciños, en concreto, de forma directa, aos habitantes das parroquias de Oza, Cances, Leiloio ou Cambre, que terían que soportar o ruído dos aeroxeradores.

Ademais, tamén destacaron que o impacto visual suporía "dinamitar todo o potencial turístico da zona de costa", xa que consideran que sería imposible un "aproveitamento turístico sustentable, baseado na fermosura e o carácter diferencial da paisaxe, nas súas praias e no patrimonio cultural e natural que atesoura".

O BNG recoñeceu a importancia da enerxía eólica para o desenvolvemento de Galicia, pero cren que debe ser "innegociable" que ese desenvolvemento respecte as persoas e o territorio.

Así mesmo, volveu a demandar unha tarifa eléctrica galega que "abarate o prezo da enerxía para todos os sectores económicos e para o consumo domiciliario", unha reivindicación que "cobra máis sentido" no contexto actual de "suba especulativa dos prezos".