Anulados os nomeamentos de tres comisións de servizo no Concello da Coruña
"Na propia sentenza sublíñase que o Concello publicou a convocatoria das vacantes para a súa cobertura polo sistema de provisión, pero despois non fixo público nin notificou ás restantes 14 persoas interesadas o resultado da selección", sinala a CIG.
Por E.P. | A CORUÑA | 27/04/2022 | Actualizada ás 17:20
O Xulgado do Contencioso-administrativo número 4 da Coruña declarou non conforme a dereito a resolución pola que o Concello da Coruña cubriu tres postos de dirección en Servizos Sociais mediante o procedemento de comisión de servizo, segundo informa a CIG.
O sindicato remarca que a sentenza conclúe "que na súa decisión o goberno municipal non foi transparente e mesmo entende que os criterios de valoración empregados foron elaborados para cada caso especificamente, sen que existisen baremos homoxéneos, cuantificables e computables".
"Na propia sentenza sublíñase que o Concello publicou a convocatoria das vacantes para a súa cobertura polo sistema de provisión, pero despois non fixo público nin notificou ás restantes 14 persoas interesadas o resultado da selección".
"Impedindo así que estas coñecesen os motivos polos que se elixiron a determinadas funcionarias e funcionarios para cubrir as comisións", indica a central sindical.
