Santiago escolle poeta para representar Galicia nun certame estatal de 'Slam Poetry'

Santiago, cidade galega da poesía. Moito despois de que Miro Villar percorrera as rúas molladas da vella Compostela cos zapatos tamén mollados, nos locais e furanchos da capital seguen a agromar as palabras dos que riscan con máis ou menos sorte na antiga lira dos versos. 

De aí que o próximo mércores 4 de maio Santiago acolla a final da IV tempada de Poetry Slam Compostela, unha xornada da que sairá o gañador deste certame que leva xa cinco veladas escollendo finalistas. Entre os participantes estarán Ademar Silvoso, Clarisa Mancini, Peter Brea, Miguel Ponce e Suturando Cicatrices, un grupo do que sairá un só para representar Galicia no encontro estatal de Poetry Slam España, no que participan trinta poetas de todo o territorio do Estado.

O evento, explican dende a organización, abrirá cunha actuación musical a cargo de Zeltia Irevire e terá lugar no coñecido Riquela Club, situado no número 35 da Rúa do Preguntoiro, en pleno corazón da Zona Vella. A admisión sae por 5€.