Traballadores dos centros de Benestar protestan ante o Consorcio para reclamar melloras laborais

Traballadores dos centros do Consorcio Galego de Igualdade e Benestar, convocados por CNT, protestaron este martes ante as portas do ente, así como ante o edificio dos sindicatos en Santiago, para reclamar melloras laborais e que garantan os seus postos de traballo.

A protesta enmarcouse na xornada de folga que este sector convocou para este martes e que, segundo trasladou a Consellería de Política Social, tivo un seguimento do 9,4%.

Ás 11,00 horas, un cento de traballadores destes centros concentrouse ante o edificio do Consorcio e reclamaron reunirse co seu xerente. Posteriormente, trasladáronse ao edificio dos sindicatos, aos que acusan de non defender as súas necesidades.

"Merecemos conservar os nosos postos de traballo". Este é o principal argumento co que a CNT convocaba esta folga, xa que consideran que a futura convocatoria pública de prazas "non dá garantías" de facer fixos aos traballadores temporais que levan anos con esta condición.

O seu delegado no Consorcio, Pablo Fernández Lois, asegurou que a formulación dun concurso-oposición "non garante" que estas persoas poidan quedar estabilizadas, a pesar de que os empregados temporais serían "os que máis opcións teñen".

Neste contexto, a CNT expón que os méritos profesionais puntúen "un 90 por cento" na convocatoria "para que se estabilice o traballador, que é o afectado polo abuso (da temporalidade), non que se estabilice a praza".

Con este proceso de estabilización, denuncia Fernándz Lois, a sanción que asume a Administración pública polo "abuso da temporalidade" é "cero", a diferenza do que ocorre se os traballadores acoden aos tribunais, que declaran que se fagan fixos.