Por Galicia Confidencial | Allariz | 21/05/2022 | Actualizada ás 11:00
A XII edición do Festival Internacional de Xardíns ten como tema central a terapia en espazos abertos e o beneficio que iso aporta á nosa saúde. Un ano máis, a colaboración entre o CEIP Padre Feijóo e o IES de Allariz plasmouse na parcela educativa na que os rapaces e rapazas quixeron representar o divertido que é xogar ao aire libre. Con este obxectivo elaboraron un xardín que leva por título “O xogo cura. Máis parque e menos pantallas".
Ata o 30 de outubro poderase visitar o recinto que alberga os dez xardíns que concursan polo voto do público, ademais do xardín gañador na pasada edición, "O camiño cara a emigración de Rosalía", e o xa devandito xardín deseñado polos alumnos e alumnas dos centros educativos de Allariz.
Doce xardíns para gozar: dez a concurso chegados de diferentes lugares, o gañador do 2021 e o realizado polo alumnado dos centros educativos de Allariz
Na máis que recomendable visita ao Festival poderanse atopar, entre os dez que concursan, xardíns realizados por paisaxistas galegos como Legado ou A árbore da vida, e tamén xardíns de Madrid, Austria, Montenegro, Italia, Colombia ou USA.
CITA ORIXINAL E CONSOLIDADA
O Festival Internacional de Xardíns de Allariz (FIXA) converteuse nunha cita consolidada no programa paisaxístico e referente pola súa particularidade: é o único das súas características que se celebra en todo o Estado. Cada ano, Allariz convoca este concurso ao que se presentan decenas de propostas chegadas de todo o mundo. Entre eles escóllense 10 que se exhiben e compiten polos votos que outorgan os máis de 40.000 visitantes que pasan cada ano polo festival.
O Festival Internacional de Xardíns de Allariz (FIXA) é o único das súas características que se celebra en todo o Estado
Segundo explicaba María López, concelleira de Promoción Económica, Comercio e Turismo, “o festival supón un importante recurso para Allariz, proba disto son os 40.000 visitantes que se achegan cada ano ao recinto. A edición deste ano fainos reflexionar sobre un tema de plena actualidade, a importancia que xogan os espazos verdes e xardíns na saúde física e mental das persoas, ademais de gozar das creacións de paisaxistas de todo o mundo, aproveitemos para pór en valor a importancia de vivir nun entorno como no que residimos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.