Rompente, o grupo poético que marcou a cultura galega da Transición
Unha tese descobre textos inéditos deste movemento cultural con base en Vigo. Reixa, Avendaño e Romón foron os seus tres últimos integrantes.
Por Galicia Confidencial | Vigo | 12/07/2014 | Actualizada ás 12:17
Unha tese doutoral desenvolvida polo investigador Alberte Valverde, da Universidade de Vigo, sacou á luz textos inéditos do grupo poético Rompente, unha iniciativa que xurdiu en 1975 a modo de revulsivo para dinamizar o campo literario galego da Transición e que rompeu coa poesía e a cultura que até entón se desenvolvía en Galicia.
A investigación, que iniciou en 2005 baixo a dirección do doutor Burghard Baltrusch e que agora ve a luz, ten como obxectivo "profundar na historia do grupo". Valverde destaca deste colectivo, "intimamente ligado á cidade de Vigo", a súa consolidación no campo literario galego como "unha experiencia singular" que con todo, tras a súa disolución e co paso dos anos, "foise esquecendo", lamenta.
"Coa chegada de Rompente sentan as bases dun discurso que ten a vangarda como núcleo e a experimentación como praxe e foi, precisamente, a vangarda o elemento vertebrador dun grupo xurdido nun momento crucial da historia de Galicia: a Transición", apunta.
Para entender Rompente hai que ter en conta o seu contexto político e cultural; a lectura der Teima, coñecer os conflitos de Ascón, entender o concepto subproletariado formulado por Xosé Manuel Beiras ou aproximarse a diferentes lecturas do marxismo da época.
En 1983, coa disolución do colectivo, Rompente descomponse nas figuras do seu tres últimos integrantes: Antón Reixa, Avendaño e Romón.
Agora, recoñece que o seguinte chanzo pasa por crear un espazo oficial na rede no que facer accesible todo o material investigado "gran parte aínda inédito", unha tarefa que fará en colaboración con Burghard Baltrusch no marco dun proxecto sobre poesía actual nos espazos públicos.
