Juan Carlos I non estará finalmente en Sanxenxo esta fin de semana por "razóns estritamente privadas"

O rei emérito español Juan Carlos I non volverá esta semana a Sanxenxo para asistir ás regatas de vela que se disputarán nos próximos días alegando "razóns estritamente privadas", segundo comunicou a súa contorna aos seus amigos do club náutico do concello.

Aínda que inicialmente a súa intención era acudir, na que sería a súa segunda visita desde que en agosto de 2020 trasladou a súa residencia a Abu Dabi, finalmente non estará esta fin de semana para a 7ª edición da Regata ReY Juan Carlos-El Corte Inglés Máster, que dará inicio á competición da clase 6 Metros que culminarán co Xacobeo 6mR Worlds, entre o 13 e o 18 de xuño.

Fontes do club náutico confirmaron que este mesmo martes, a tres días de que arrinque a regata que leva o seu nome, o emérito trasladoulles a través da súa contorna que o "sente moitísimo", pero que non poderá estar presente "por razóns estritamente privadas" que non concretou.

Cabe lembrar que Juan Carlos permaneceu en casa do presidente do Club Náutico de Sanxenxo, o seu amigo Pedro Campos, entre os pasados días 19 e 23 de maio, data na que --antes da súa volta a Abu Dabi-- realizou unha parada en Madrid para ver a súa familia no Palacio da Zarzuela. Alí estivo once horas e puido manter co seu fillo, Felipe VI, "un amplo tempo de conversa" no que abordou "cuestións familiares así como sobre distintos acontecementos e as súas consecuencias na sociedade española" desde que o emérito se trasladou ao país do Golfo.

En Sanxenxo, a falta de confirmación oficial, aínda esperaban que Juan Carlos I puidese regresar despois da gran expectación mediática e social que espertou a súa estancia durante a fin de semana do Trofeo Viaxes Interrías.