Por Europa Press / Redacción | SANTIAGO DE COMPOSTELA | 09/06/2022 | Actualizada ás 14:30
Traballadores do sector do metal na provincia da Coruña secundaron a sétima xornada de folga, con mobilizacións e piquetes informativos, en demanda dun convenio "digno" e con reivindicacións en materia salarial e tamén de subrogación de empregados. Nesta ocasión, as protestas tiveron lugar na Coruña, a comarca de Ferrol e Santiago de Compostela.
No polígono de Cerceda, as mobilizacións comezaron ás 6,30 horas, "onde as empresas afectadas polo convenio do metal estaban xa pechadas", segundo explicou o portavoz de CIG-Industria, Eduardo Caamaño.
Na cidade da Coruña, os traballadores saíron ás 11,30 horas en manifestación "pacífica" de Agrela, entre petardos e bucinazos. Escoltados pola Policía Nacional e Local, cortaron o tráfico no seu percorrido por varias rúas céntricas ata chegar á sede da patronal ao berro de "convenio do metal solución", "patronal, escoita, o metal está en loita" e "así, así, nin un paso atrás; folga, folga, folga do metal".
SEGUIMENTO DO PARO
CIG-Industria calcula que o seguimento da folga na provincia foi "igual que en xornadas anteriores". "Un 80% en empresas superiores aos 50 traballadores" e naquelas que teñen menos empregados "está a sumarse cada vez máis xente", detallaron.
Caamaño destacou que o "100% das auxiliares de Navantia están paradas" e estimou que "preto de 3.000 persoas" participaron na mobilización da Coruña. Fontes da Policía Local, pola súa banda, contabilizaron 400 manifestantes.
En canto ao diálogo coa patronal, segundo explicou o portavoz sindical, na última reunión --celebrada o pasado luns 6 de xuño-- "ningunha das partes cedeu ás súas pretensións". Os traballadores están "dispostos a negociar", asegurou, pero van continuar as mobilizacións convocadas polos sindicatos CIG, CCOO e UGT para os días 28, 29 e 30 deste mes.
Caamaño avanzou que o programa previsto para os próximos días "é o mesmo" que en xornadas previas á folga. Celebraranse "asembleas en todos os centros de traballo" para que as mobilizacións de finais deste mes "sexan secundadas por máis persoal", explicou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.