A Policía Autonómica fixo nos dous últimos anos 470.000 actuacións, case 120.000 asociadas á pandemia

A Policía Autonómica levou a cabo ao longo dos dous últimos anos un total de 470.000 actuacións, case 120.000 delas asociadas á pandemia. Así figura nun informe analizado no Consello da Xunta celebrado este xoves, tras o cal, o presidente galego, Alfonso Rueda, volveu reclamar ao Goberno central que actualice o convenio para proceder á cobertura de vacantes na unidade adscrita da Policía Nacional.

Os axentes da Autonómica realizaron 86.000 inspeccións e 53.000 dispositivos, ademais de formular 20.000 denuncias e levar a cabo 413 detencións ou investigacións.
No traballo deste corpo durante os dous últimos anos destaca o labor da unidade centrada na pandemia, que sumou máis de 118.000 actuacións.

Outro dos ámbitos destacados foi a protección das vítimas de violencia de xénero, que conta na actualidade con 279 persoas activas no sistema de vixilancia, cinco máis que ao peche de 2021.

Ademais, realizaron 2.212 traslados de menores ao longo dos dous últimos anos para levalos a centros de menores, fiscalía, colexios ou visitas médicas, entre outros motivos.