Por Europa Press / Redacción | Santiago de Compostela | 21/06/2022 | Actualizada ás 14:43
A Axencia Estatal de Meteoroloxía (Aemet) prevé un verán "máis cálido e máis seco" do habitual en toda a península, segundo informou o seu delegado en Galicia, Francisco Infante. "Hai maior probabilidade de que as precipitacións se produzan na parte seca", puntualizou.
Para os próximos días, adiantou que "se mantén a situación de inestabilidade" con "nubes, treboadas e chuvascos", con temperaturas "agradables" aínda que "por baixo do normal para esta época do ano".
Infante prognosticou unha noite de San Xoán na que "cesarán as treboadas, pero manterase o fluxo húmido do Atlántico con algunha néboa e rosada un pouco molesto". As temperaturas serán "fresquiñas", con mínimas ao redor dos 12 graos, e o mar estará "bastante tranquilo".
Este venres, unha "fronte atravesará Galicia" e deixará precipitacións "ata boa parte do sábado", segundo informou.
A partir desta data, un anticiclón exercerá a súa influencia e as precipitacións "tenderán a desaparecer", pero as temperaturas vanse manter "por baixo dos valores normais", con máximas ao redor dos 20 graos e mínimas entre 10 e 12.
MAIO "EXTREMADAMENTE CÁLIDO"
Os datos solicitados pola Aemet conclúen que o mes de maio foi "excepcional e extremadamente cálido"; o segundo con máis temperatura de toda a serie histórica, só superado polo de 2020. A máxima alcanzouse en Ribadavia (Ourense), o día 28 de maio, con 37 graos.
O mes de xuño, ata o momento foi "máis chuvioso do normal" e con temperaturas "por enriba dos valores normais, agás esta última semana", segundo explicou Infante, quen destacou que se rexistraron treboadas "11 dos 20 días do mes".
Con respecto á onda de calor que azoutou a península nos últimos días, destacou que foi "moi extensa", xa que afectou a todo o territorio "agás o norte e Galicia", e "a máis intensa" que empezou antes do 15 de xuño desde que existen rexistros.
O delegado de Aemet considerou que a primavera en xeral foi "moi seca e moi cálida" en Galicia, con temperaturas mínimas e máximas "moi altas".
En canto ao balance hidrolóxico, existe un "déficit claro de precipitación" na vertente atlántica e, no caso concreto de Galicia "choveu case un 40% menos" do habitual.
"Estamos en seca meteorolóxica desde febreiro", puntualizou Infante, e, "de aquí a outono, é pouco probable que saiamos desta situación". Engadiu, con todo, que en Galicia "as tendencias cambian moi rapidamente coa chegada das choivas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.