Hostaleiros de Santiago protestan pola escaseza de taxis

Hostaleiros de Santiago de Compostela expresaron a súa protesta pola escaseza do servizo de taxis da cidade, que está a xerar incomodidades aos visitantes e repercutindo negativamente na imaxe da cidade. Foi a Asemblea da Asociación Hostalaría Compostela a que deu conta desta crítica realizada por algúns establecementos asociados.

"Nos últimos tempos, os hoteis e pensións da cidade están a ver como a súa clientela está a ter serios problemas para desprazarse con este servizo, provocando numerosas queixas e repercutindo negativamente na imaxe que a cidade ofrece sobre o seu turismo", apunta a entidade, que solicitou unha reunión co alcalde.

Na Asemblea Xeral Común da asociación fíxose balance do primeiro ano de mandato á fronte de Hostalaría Compostela de Thor Rodríguez e a súa directiva, que tomaron o mando da entidade en xullo de 2021.

Os principais eixos de traballo durante este ano foron a defensa dos dereitos "dun sector moi castigado pola pandemia" de covid-19, a recuperación da actividade formativa no Centro de Formación e Cultura da Rúa Salvadas e a organización de diferentes eventos que "axudaron a dinamizar a cidade en épocas de menor impacto turístico", como foron o concurso de tapas Santiago(é)Tapas en novembro de 2021 e o I Encontro do Viño Galego Revera Vinum en marzo de 2022.

Neste tempo tamén se traballou na recuperación económica da propia entidade, que viña arrastrando serios problemas contables, logrando unha "importante mellora que actualmente permite a súa continuidade".