A Xunta pide aos concellos que impoñan máis restricións no uso da auga

A Xunta de Galicia trasladou este mércores aos municipios que se abastecen do Tambre e dos ríos que desembocan na ría de Muros-Noia "a necesidade de intensificar a contención e o aforro no consumo de auga para garantir o abastecemento á poboación" ante a prelaerta por escaseza que se declaraba a finais da semana pasada. Con todo, non se modificou nada do acordado en reunións anteriores. Unha circunstancia rechamante meses despois de que plataformas ecoloxistas denunciaran o abandono de parte da Xunta dos moitos humidais de Galicia, ecosistemas clave para o mantemento dos recursos hídricos. 

En calquera caso, o xerente de Augas de Galicia, Gonzalo Mosquera, reuniuse telematicamente con representantes dos 21 municipios dependentes do citado sistema de explotación, cos que abordou as medidas a adoptar por parte das localidades afectadas e que se recollen no Plan de seca dá demarcación hidrográfica de Galicia-Costa para "prealerta por escaseza".

O organismo autonómico incidiu na importancia de "conter o máximo posible" os consumos municipais prescindibles. Os concellos aos que afecta, principalmente, son a Santiago, Ames, A Baña, Brión, Cerceda, Frades, Lousame, Mesía, Muros, Negreira, Noia,O Pino, Ordes, Oroso, Outes, Porto do Son, Rois, Tordoia, Trazo, Val do Dubra e Vilasantar.

Informouse tamén da situación dos caudais circulantes rexistrados actualmente na conca do río Tambre. Así, na estación de referencia rexistráronse valores de 3.61 m3/s en media durante o último mes, mentres que a media histórica sitúase en 4.5 m3/s; un 20% por baixo.

Na reunión abordouse ademais a posibilidade de utilizar o agura do encoro de Vilagudín en caso de empeorar a situación. Construído para fornecer auga á central de Meirama, o Goberno galego estuda agora utilizar a auga dispoñible nel como reserva, "en caso de ser necesaria para garantir os abastecementos dos concellos que captan augas desde este punto cara abaixo".

Por último, a Xunta fixo un chamamento á responsabilidade e insistiu en que "para afrontar en boas condiciones situacións deste tipo necesítase anticipación e planificación". "Os concellos deben dotarse de plans de emerxencia fronte á seca; coñecer a súa rede de abastecemento, localizando posibles perdas coa realización de auditorías; e alcanzar unha xestión máis profesionalizada da auga", defenden.

PREALERTA EN AMES

Unha das últimas localidades en sumarse á alerta por escaseza foi Ames, motivo polo que participou na reunión deste mércores. Nun comunicado, o concello avanzou que continuará coas medidas de aforro e concienciación que xa puxo en marcha en xuño.

Entre elas, a publicación dun vídeo o pasado luns no que se explica a "preocupante" situación que enfronta o municipio e na que o alcalde de Ames, Blas García, pide a colaboración dos veciños. Este súmase a medidas previas como controlar e reducir a rega dos xardíns municipais e de zonas verdes, así como a cantidade de auga potable que se gasta nos baldeos e servizos de limpeza. Ademais, púxose en marcha a campaña 'Augaconsellos', unha serie de recomendacións e medidas para animar aos veciños a facer un uso responsable da auga --ducharse en lugar de bañarse, encher a lavadora, pechar a billa mentres non se estea usando como tal, etc.--.

SANTIAGO CONTINÚA COAS MEDIDAS

Pola súa banda, o concello de Santiago continuará aplicando as medidas de aforro no consumo de auga que puxo en marcha o 1 de agosto, dada a situación de prealerta por seca. Así o confirmou a concelleira de Medio Ambiente, Mila Castro, que participou este mércores na reunión telemática con Augas de Galicia.

A reunión, relatou a concelleira, tivo dous partes. Na primeira, o organismo autonómico explicou a situación hidrolóxica do Tambre; e na segunda, os municipios participantes informaron dos problemas que se estaban atopando na subministración e captación, ademais de dar conta das medidas adoptadas.

Ademais das mencionadas medidas --entre as que se atopan a redución de regas en zonas verdes e de baldeos--, o Concello tamén anunciou que intensificará a campaña de sensibilización que teñen en marcha.

PONTEVEDRA, "COS DEBERES FEITOS"

Outro dos municipios que participou na reunión foi Pontevedra. A súa concelleira, Carme da Silva, expresouse nos mesmos termos que Santiago e Ames, asegurando que continuarán coas medidas xa en marcha. Entre elas atópanse algunhas prohibicións como a dos baldeos, non obrigatorias en situación de prealerta pero que tomaron no seu momento "para evitar confusións entre a poboación".

Aínda que sinalou que o caudal do Lérez está a baixar, tamén o está facendo o consumo. A concelleira lembrou que o nivel para pasar a alerta por escaseza está en 1,17 metros cúbicos por segundo, un punto ao que, destacou, aínda non se chegou. Da Silva confía en que o consumo xeral do sistema empece a baixar a partir de agora, xa que hai concellos que rexistran unha forte estacionalidade no uso da auga durante o verán.

Por último, lembrou que Pontevedra chegou a esta situación "cos deberes feitos", xa que rexistra unha eficacia na administración municipal da auga do 91% --a última lei do ciclo da auga estipula un 80%-- e prognosticou unhas xornadas "malas" en canto á climatoloxía. "Esperemos que as treboadas descarguen, pero as previsións son malas. As choivas da semana pasada foron unha miraxe", lamentou.

Caudal do río Tambre ao seu paso por Ponte Maceira, en Negrerira / Concello de Ames. / Europa Press