As máscaras seguirán sendo obrigatorias nos avións, pero non nos aeroportos

O Ministerio de Transportes, Mobilidade e Axenda Urbana aclarou que as máscaras seguirán sendo obrigatorias a bordo dos avións, do mesmo xeito que ocorre co resto de transportes públicos como trens, barcos ou autobuses. No acceso aos aeroportos, estacións ou plataformas, a máscara non será obrigatoria, aínda que si recomendada.

A ministra de Transportes, Mobilidade e Axenda Urbana, Raquel Sánchez, indicou este xoves durante a súa intervención no Pleno extraordinario do Congreso que "no caso do transporte aéreo, ante a evolución da emerxencia sanitaria provocada pola Covid-19, o real decreto lei elimina a obrigatoriedade da aplicación das directrices vinculadas coa pandemia nos aeroportos e establécese que sexan recomendacións".

"Elimínase a obrigatoriedade do uso de máscara, a toma de temperatura ou o mantemento da distancia nos controis", puntualizou referíndose en concreto ás instalacións aeroportuarias.

Durante a defensa do decreto lei de medidas de sustentabilidade económica no ámbito do transporte, así como de medidas de aforro, eficiencia enerxética e de redución da dependencia enerxética do gas natural, a ministra indicou que "con esta modificación seguimos os pasos dos países da nosa contorna, eliminando traballas e potenciando a competitividade dos sectores do transporte e turismo".

As palabras da ministra chegan despois de que no mes de maio a Axencia Europea de Seguridade Aérea (EASA) e o Centro Europeo para a Prevención e Control de Enfermidades (ECDC) eliminasen a recomendación de levar obrigatoriamente máscara en aeroportos e a bordo de avións. Unha medida que deixaban a elección das aerolíneas e os distintos países.

Imaxe de arquivo dun aeroporto - Europa Press | Fonte: Europa Press