Sabes canto custa a casa de luxo de Galicia máis visitada en idealista.com?
É un chalé en Cariño con baixada directa ao mar.
Por Europa Press / Redacción | SANTIAGO DE COMPOSTELA | 29/08/2022 | Actualizada ás 12:15
Un chalé en Cariño é a casa de luxo de Galicia máis visitada no portal idealista.com. En concreto, trátase dunha vivenda á venda por 3.760.000 euros. A maioría de españois recoñece buscar vivendas de luxo que non se poden permitir, un pasatempo máis frecuente nos meses estivais, segundo unha enquisa publicada por idealista en 2021.
As vivendas de luxo que máis interese suscitaron este verán concéntranse principalmente en Baleares e a Comunidade de Madrid, aínda que unha vivenda cántabra conseguiu coarse entre as 10 preferidas.
No caso de Galicia, o chalé de Cariño atópase, segundo a descrición, "nunha contorna privilexiada e dominando a ría". Está "proxectado polo prestixioso arquitecto do movemento moderno Ignacio José Bescansa Aler e construído sobre unha punta que lle confire unha vista frontal panorámica e espectacular de mar, praias e montañas", sinala.
"Os seus 12.500 metros cadrados de parcela ofrecen múltiples e amplos recunchos con total privacidade para gozar plenamente da vida sen ser molestado. A orientación da propiedade é inmellorable e a casa recibe sol todo o día", segundo a web.
