Formoso critica á Xunta por "sacrificar profesorado" para pagar "artistas e festas" durante o verán
Compromete a gratuidade de libros de texto e denuncia recortes educativos mentres se gasta no Xacobeo. O PPdeG di que axuda as familias que non teñen recurso e que só pagan "os que teñen recursos altos".
Por Europa Press / Redacción | SANTIAGO DE COMPOSTELA | 29/08/2022 | Actualizada ás 12:09
O secretario xeral do PSdeG, Valentín González Formoso, comprometeu que "a primeira medida" que "adoptará o Goberno socialista" cando "chegue á Xunta" será recuperar a gratuidade dos libros de texto, que foi suprimida coa chegada de Alberto Núñez Feijóo ao Executivo galego en 2009.
En rolda de prensa este luns en Santiago, Formoso alertou da "deterioración" do sistema educativo co PP na Xunta. Por iso, demanda recuperar a gratuidade dos libros de texto, que supoñen "un custo medio de 1.000 euros por familia no peor momento inflacionista da historia". Considera que esta proposta é "perfectamente asumible" polo Executivo autonómico.
Así mesmo, denuncia un recorte dun milleiro de profesores e 60 unidades educativas neste comezo de curso, con colexios e IES nos que a matrícula "sobe". "Unha política de recortes en lugar de aforrar o que despois gastamos en concertos do Xacobeo ao longo e ancho de todo o país durante todo o verán", reproba. "Sacrificamos profesorado para pagar artistas e por festas durante todo o verán en Galicia", quéixase.
FP
De tal forma, dixo estar "alarmado" pola radiografía educativa en Galicia. Valora que o Goberno central puxo partidas como 130 millóns adicionais para o ámbito da FP, pero critica que os recortes da Xunta fan que "30.000 galegas e galegos que querían estudar un ciclo formativo quedan fóra do sistema educativo profesional en Galicia"
Igualmente, chamou a "un esforzo" no rural no ámbito educativo, sanitario e de transportes para que se manteña a poboación. Así, advertiu de que co PP na Xunta perdéronse 130.000 habitantes en Galicia, a comunidade "co peor comportamento demográfico". "E a resposta do Goberno galego é seguir pechando nestes 14 anos 138 colexios en toda Galicia", reprochou.
RESPOSTA DO PP
Pola súa banda, o portavoz parlamentario de PP, Pedro Puy, afirmou que "a gratuidade absoluta" dos libros de texto "é regresiva", de forma que defende que o actual sistema da Xunta "é máis redistributivo".
Respecto diso, Puy defende non pagar os libros ás familias que "teñen, afortunadamente, altos recursos" e que "poden asumir perfectamente o custo de inicio de curso", á vez que aposta por "reforzar" ás rendas baixas, polo que considera que esa proposta "non é acorde" cos valores que di defender o PSOE.
