A conselleira de Mar sobre as mareas vermellas: "Non se pode facer nada... Hai que ter paciencia"
Pide a Bruxelas que non goberne tendo "exclusivamente" en conta as presións ambientais.
Por Europa Press / Redacción | VIGO | 23/09/2022 | Actualizada ás 12:00
A conselleria de Mar da Xunta de Galicia, Rosa Quintana, pediu este venres á Comisión Europea que non goberne tendo "única e exclusivamente" en conta as presións ambientais. Así o sinalou Quintana tras ser preguntada polos medios de comunicación sobre se espera que a semana que vén Bruxelas cambie de parecer sobre o veto á pesca de fondo en 87 áreas, que afectará a gran parte da frota galega.
Neste sentido, a titular de Mar pediu á Comisión que "tome conciencia" de que tomou unha decisión "desde o punto de vista equivocado", danando a "todo o sector pesqueiro", non só de España, senón doutros países como Francia ou Irlanda.
"Creo que un bo comisario debe de ter en conta o seu propio regulamento de base. Ese regulamento da Política Pesqueira Común establece a necesidade de manter un equilibrio de aspectos ambientais, sociais e económicos", reivindicou Quintana.
Por iso, cargou contra o comisario de Medio Ambiente, Océanos e Pesca, Virginijus Sinkevicius, dicindo que desde a súa chegada ao posto só ten en conta "situacións ambientais", esquecéndose da parte "social e económica".
MAREA VERMELLA
Noutra orde de cousas, e preguntada sobre as mareas vermellas, indicou que se trata dun proceso natural "como consecuencia das boas condicións das rías galegas".
"É un proceso natural, unha explosión do fitoplancto que non se pode facer nada para evitalo. Hai que ter paciencia e esperar a que pase o episodio tóxico e despois os produtos volven estar en completas garantías de calidade sanitaria", explicou.
Ante a posibilidade de abrir algunhas zonas que na actualidade están afectadas, Quintana subliñou que se fan controis diarios. Segundo dixo, neste momento hai tres tipos de toxicidade diferentes, unhas células baixaron e outras subiron. "Ata que non existan ningunha das células causantes desas toxinas non se pode abrir", engadiu.
