Galicia é a autonomía que máis fondos recibe polo mecanismo de compensación de CO2 a industrias
De 244 millóns de euros, recibiu 43,9 millóns de euros.
Por E.P. | Oviedo | 26/09/2022 | Actualizada ás 18:20
O Ministerio de Industria, Comercio e Turismo publicou a proposta de resolución provisional pola que se aproban axudas por unha contía de 244 millóns de euros para as empresas electrointensivas dentro do mecanismo de compensación de dióxido de carbono (CO2), da que se beneficiarán 212 instalacións produtivas. Desta repartición, 13 instalacións radicadas en Galicia reciben un total de 43,9 millóns de euros, o que a converte no territorio máis beneficiado, co 18 por cento.
Segundo informou o gabinete dirixido por Reyes Maroto, este programa reforzouse con 65 millóns de euros, "o que mostra o compromiso do Goberno coa industria electrointensiva e permite mellorar a súa competitividade, reforzar as súas capacidades industriais e o emprego".
Este incremento no programa recolleuse no Real Decreto-lei 6/2022, de 29 de marzo, polo que se adoptaron medidas urxentes no marco do Plan Nacional de resposta ás consecuencias económicas e sociais da guerra en Ucraína.
Por comunidades autónomas, Galicia é a que ten maior porcentaxe de axudas, co 18% do total, seguida de Asturias, co 16%, e de País Vasco, co 15%. Por sectores, a maior contía corresponde ao do ferro e aceiro, co 37,5%, seguido do papel co 18,5%, e o aluminio, co 15%.
A estas axudas poden acollerse as sociedades mercantís do sector privado, estean ou non incluídas en réxime de comercio de emisións, que realicen unha ou varias actividades nos sectores ou produzan os produtos enumerados no Anexo I das Directrices relativas a determinadas medidas de axuda estatal no contexto do réxime de comercio de dereitos de emisión de gases de efecto invernadoiro despois de 2021.
