O conselleiro de Educación defende que o sistema de axudas a libros en base á renda "funciona razoablemente ben"

O PSdeG reclama "libros gratuítos para todos"

Por Europa Press / Redacción | SANTIAGO DE COMPOSTELA | 28/09/2022 | Actualizada ás 18:37

Comparte esta noticia

O conselleiro de Educación, Román Rodríguez, adiantou este mércores que o Consello da Xunta desta semana aprobará o incremento do 50% das axudas para material escolar, que pasarán de 50 a 75 euros para as unidades familiares con menos de 6.000 euros de renda per cápita.

Rodríguez defendeu na sesión plenaria o sistema de axudas para libros de texto que impulsa a Xunta, "progresivo" e baseado no nivel de renda das familias, un sistema que "funciona razoablemente ben" e "non chega a unha minoría", se non "ao 75% das familias".

Así o dixo en resposta a unha interpelación no Parlamento formulada pola deputada socialista Noelia Otero, que reivindicou "libros gratuítos para todos", a imaxe do banco de libros que, no seu día, promoveu o Goberno bipartito liderado por Emilio Pérez Touriño.

Na súa intervención, Otero advertiu do "panorama dantesco" que teñen por diante as familias galegas por mor da crise e afeou un sistema de axudas a libros e material escolar que, dixo, "non chega nin á metade do alumnado".

Fronte a isto, a deputada do PSdeG dixo que o sistema do bipartito "era unha medida máis eficiente" e, ademais de "chegar a máis alumnos", supuña un menor custo. "Non é máis caro", apostilou.

UN SISTEMA "XUSTO"

En contraposición, Román Rodríguez defendeu o sistema actual en base á renda que, asegurou, chega "ao 75% das familias galegas". "Pareceríalle ben que os cidadáns galegos pagásennos os libros aos que estamos neste Hemiciclo, ou aos que están fóra e teñen salarios maiores que nós?", preguntou, en referencia ao sistema universal.

O sistema galego, lembrou o conselleiro, combina axudas económicas para a adquisición de libros nos niveis nos que non son reutilizables, un fondo de libros, cheques para compra de material escolar e utilización do libro dixital.

En datos, Román Rodríguez asegurou que o fondo de libros --de terceiro de primaria a cuarto de ESO-- beneficia a uns 80.000 alumnos, en base a criterios de renda, mentres que 26.800 alumnos son beneficiarios das axudas para adquisición de manuais de primeiro e segundo de primaria e educación especial.

En canto ao material, escolar, as familias con rendas inferiores a 6.000 euros por integrante, que recibían un cheque de 50 euros, pasarán a recibir 75 euros. Todo iso compleméntase con 60.000 usuarios de libro dixital, dixo o conselleiro. Para Román Rodríguez, o adecuado é establecer un "sistema xusto, solidario e redistributivo" que "concentre as axudas nas familias que máis o necesitan".

Paralelamente, acusou á deputada socialista de "tentar desviar a atención" sobre "os erros do Goberno central", xa que é a aplicación da Lomloe a que obriga a cambiar todos os manuais dos cursos impares. "A necesidade este ano de facer fronte a un maior numero de compra de libros é pola implementación atropelada da Lomloe", dixo Rodríguez, que afeou ao Goberno de Pedro Sánchez que non puxese en marcha "ningunha medida" económica para axudar ás familias.

Arquivo - Libros de texto de Educación primaria.. EUROPA PRESS - Arquivo
Arquivo - Libros de texto de Educación primaria.. EUROPA PRESS - Arquivo

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta