Reputan casos activos e hospitalizacións nunha xornada con dous novos falecidos con covid
Hai tres persoas en coidados intensivos.
Por Europa Press / Redacción | SANTIAGO DE COMPOSTELA | 06/10/2022 | Actualizada ás 10:58
Galicia segue na tendencia á alza en coronavirus, con máis casos activos, novos positivos e persoas hospitalizadas que 24 horas antes, así como a notificación doutros dous falecidos pola pandemia, co que a cifra total de vítimas mortais ascende a 3.918.
Segundo a información achegada pola Consellería de Sanidade, o pasado 4 de outubro producíronse dúas mortes vinculadas coa covid-19: a dunha muller de 93 anos na área sanitaria de Ourense e a doutra muller de 92 na área sanitaria de Santiago.
Por outra banda, con datos recolleitos ata as 18.00 horas do mércores, Galicia conta con 1.495 casos activos, 131 máis que 24 horas antes, tras a detección de 177 positivos (+4). A cifra de hospitalizados, pola súa banda, tamén creceu, con 115 fronte a 109. No caso dos pacientes en planta, hai 112 (+7), mentres que en coidados intensivos hai 3 (-1).
Por áreas sanitarias, todas experimentaron un incremento no cómputo global dos seus pacientes covid ingresados, fóra de Ferrol, que continúa con 4 enfermos en planta. En relación á hospitalización convencional, 38 pacientes están na área da Coruña, 19 na de Ourense, 17 na de Vigo, 12 na de Pontevedra, 11 na de Santiago e na de Lugo. Só hai tres pacientes covid positivo na UCI en Galicia e están na Coruña (1) e Vigo (2).
NOVOS CASOS E ACTIVOS
En canto aos novos casos detectados e aos activos por covid, o último parte do Sergas reflicte un incremento en todas as áreas sanitarias. Concretamente, a que máis casos activos segue tendo é a da Coruña, con 334, seguida da de Ourense, con 253, a de Santiago, con 251, a de Vigo, con 219, a de Lugo, con 171, a de Pontevedra, con 157 e a de Ferrol, con 110.
En canto aos positivos detectados en 24 horas, a área da Coruña rexistrou 47, mentres que a de Ourense tivo 35 e a de Santiago 33. A área de Vigo anotou 22 positivos, a de Pontevedra 18, a de Lugo 12 e a de Ferrol 10. Desde o inicio da pandemia, resultaron contaxiadas en Galicia 678.744 persoas e superaron a enfermidade 673.440, mentres que faleceron con covid 3.918 persoas.
Por outra banda, realizáronse case catro millóns de probas de detección PCR, case dous millóns de probas de antíxenos, e 1,6 millóns doutro tipo de probas. Con respecto ás vacinas, fornecéronse algo máis de 6,7 millóns de doses.
