O 60% dos médicos da Primaria atenden a máis pacientes dos recomendados e case un 8% ao dobre
A metade dos médicos de atención primaria do Sergas prolonga a súa xornada para atender aos seus pacientes, segundo O'Mega.
Por Europa Press / Redacción | SANTIAGO DE COMPOSTELA | 14/11/2022 | Actualizada ás 12:21
O sindicato médico O'Mega denunciou que "máis da metade" dos facultativos de atención primaria no Servizo Galego de Saúde prolongan a súa xornada laboral para poder atender aos seus pacientes.
O colectivo fixo públicos este luns os datos dunha enquisa realizada entre 1.400 médicos que, segundo resalta O'Mega nun comunicado, referenda as súas alertas sobre a "sobrecarga" de traballo á que deben facer fronte os profesionais en Galicia.
Así, o 15,6% asegura que "sempre" están obrigados a estender a súa xornada para facer fronte a todos os pacientes asignados cada día, algo que o 18,6% di realizar "dous ou tres días á semana" e un 28,1% de forma ocasional.
Deste xeito, O'Mega remarca que "apenas un de cada tres facultativos" do Sergas é capaz de atender toda a súa axenda sen necesidade de realizar máis horas das establecidas no seu contrato. En canto ao tempo, son maioría --o 86,6%-- quen prolongan a súa xornada unha hora, aínda que o 9,4% di facelo entre dous e tres horas, barreira que exceden o 4% dos enquisados.
O sindicato incide en que só un terzo dos médicos atende ao número de pacientes establecido pola Xunta dentro dos estándares de calidade asistencial (entre 32 e 40 pacientes ao día). O 28% di ver cada día entre 40 e 45 persoas, o 21% entre 45 e 50, cifra que aseguran superar o 7,7%, que denuncia que, en ocasións, superan a barreira dos 60.
PUNTO DE ATENCIÓN CONTINUADA
A enquisa de O'Mega tamén recolle datos sobre os médicos dos puntos de atención continuada do Sergas, entre os que o 17,6% sostén que traballa por encima do límite legal da xornada laboral en España (160 horas) e case un de cada catro afirma que son movidos a outros centros por causas organizativas ante a falta de persoal.
Entre os participantes no estudo do sindicato hai un 35% de médicos que teñen máis de 60 anos e o 65,4% superan os 50, o que, para O'Mega, revela o problema que existe en Galicia coa substitución xeracional dos facultativos, unha situación que "se agravará nos próximos anos" posto que "dous de cada 10" xubilaranse no próximos cinco anos.
