Galicia aumenta os pasaxeiros do autobús urbano en novembro, pero é a segunda comunidade que menos crece
Subiu un 12,2% fronte o 17,7% nacional
Por Europa Press / Redacción | SANTIAGO DE COMPOSTELA | 11/01/2023 | Actualizada ás 11:25
O número de viaxeiros transportados en autobús urbano en Galicia superou os 4,85 millóns durante o mes de novembro, o que supón un crecemento do 12,2% en comparación co undécimo mes de 2021, segundo datos publicados este mércores polo Instituto Nacional de Estatística (INE), recollidos por Europa Press.
Desta maneira, Galicia situouse entre as comunidades españolas onde menos subiu o número de usuarios de buses urbanos, só por diante de Aragón (+7,6%). De media, en España esta cifra subiu un 15,3%, ata 146,8 millóns de persoas. No que vai de ano, os viaxeiros neste tipo de transporte público subiron na Comunidade galega un 19,3%, mentres que no total do país este ascenso foi do 24,2%.
DATOS NACIONAIS
A nivel nacional, máis de 423,9 millóns de pasaxeiros utilizaron o transporte público o pasado mes de novembro, un 17,7% máis que no mesmo mes do ano 2021, sempre segundo datos feitos públicos este mércores polo INE.
O transporte urbano aumentou un 16,6% en taxa anual e o interurbano un 22,5%. Dentro do interurbano, destaca o incremento do 26,7% rexistrado no transporte aéreo e de case o 72% do ferrocarril de media distancia.
A taxa de variación do número de pasaxeiros do transporte público do mes de novembro respecto de outubro foi do -1,2%. Este descenso é inferior ao rexistrado en taxa intermensual nos últimos anos. Así o pasado ano rexistrouse un incremento do 1,6% fronte aos descensos máis acusados dos anos anteriores: -6,7% en 2020, -8,8% en 2019 e -6,4% en 2018. Os datos do INE mostran que o transporte urbano foi utilizado por máis de 256 millóns de viaxeiros en novembro, un 16,6% máis que no mesmo mes do ano 2021.
O transporte por metro aumentou un 18,5% en taxa anual. O metro de Palma presentou o maior incremento, do 46,2%, e o de Bilbao o menor, do 11,9%. Entre as cidades que posúen metro, a maior subida no transporte por autobús rexistrouse en Palma (24,0%), e a menor en Sevilla (8,4%). O transporte urbano por autobús aumentou un 15,3% en novembro respecto ao mesmo mes de 2021.
Todas as comunidades autónomas presentaron taxas anuais positivas no transporte por autobús. As maiores subidas déronse en Comunitat Valenciana (22,4%), Estremadura (21%) e Canarias (20,9%). Pola súa banda, Aragón (7,6%), Galicia (12,2%) e País Vasco(12,8%) rexistraron os menores incrementos.
Doutra banda máis de 120,8 millóns de viaxeiros utilizaron o transporte interurbano en novembro, o que supón un incremento do 22,5% respecto ao mesmo mes de 2021. Por tipo de transporte, o aéreo creceu un 26,7%, por ferrocarril un 25%, por autobús un 20,4% e o marítimo un 6,4%.
Proximidades sobe un 18,4% no transporte por autobús e un 23,1% no transporte por ferrocarril. A media distancia creceu un 24,1% no transporte por autobús e un 71,7% no ferroviario. Por último, a longa distancia aumentou un 50,1% no transporte por autobús e un 12,9% no ferrocarril. Dentro deste último, a Alta Velocidade creceu un 15,1%.
TRANSPORTE ESPECIAL
No referido ao transporte especial e discrecional os datos do instituto estatístico mostran como máis de 47,1 millóns de usuarios utilizaron transporte especial e discrecional en novembro, o que supón un incremento do 11,8% en taxa anual. O número de pasaxeiros do transporte especial subiu un 0,9% e supera os 33,5 millóns de usuarios. Dentro deste, o escolar baixou un 1,8%, e o laboral aumentou un 11,8%. Pola súa banda, o transporte discrecional creceu un 52,3% respecto ao mesmo mes do ano 2021, con máis de 13,6 millóns de viaxeiros.
