A Deputación de Cádiz quere coñecer o modelo de mobilidade de Pontevedra para "trasladalo" á súa provincia

O departamento de Mobilidade da Deputación de Pontevedra recibiu este mércores unha nova visita institucional á provincia: a Deputación de Cádiz quere coñecer o modelo de recuperación do espazo público que está a desenvolver o goberno pontevedrés e ver como é a súa aplicación práctica nas vilas e cidades da provincia para valorar se é factible aplicar a iniciativa no seu propio territorio.

A visita da delegación de Cádiz está formada polo vicepresidente segundo da Deputación e responsable da área de Transición Ecolóxica e Desenvolvemento Urbano Sustentable, Francisco Javier Vidal Pérez; a directora da Fundación Medio Ambiente, Enerxía e Sustentabilidade da Provincia, María Teresa Fernández Mota Martos; e o técnico do mesmo organismo Anxo David Domínguez Ruso, quen é responsable de proxectos de mobilidade sustentable.

O programa da visita, que se prolongará ata o venres 13 de xaneiro, incluirá unha recepción institucional por parte da presidenta pontevedresa, Carmela Silva, e o deputado de Mobilidade, Uxío Benítez, así como unha xornada de traballo teórica co persoal de Mobilidade, que achegará os datos de proxectos, metros cadrados de espazo público recuperados, así como outras cuestións de tipo práctico.

Segundo detallou o deputado de Mobilidade, a xornada de traballo deste xoves centrarase na visita dos casos prácticos: obras realizadas seguindo o decálogo 'Ágora', que establece que as persoas deben ser o eixo do deseño urbano, ao entender que o dereito ao espazo público é fundamental e está ao mesmo nivel que o dereito á Sanidade ou a Educación. Uxío Benítez indicou que a visita dos representantes da Deputación gaditana servirá de "intercambio de experiencias" para "aprender uns dos outros".

Pola súa banda, o vicepresidente da Deputación de Cádiz sinalou que o obxectivo desta visita é "ver de que forma pódese trasladar" á súa provincia o modelo e o traballo feito en Pontevedra, seguindo a filosofía de 'as persoas primeiro' e pensando, especialmente, nos concellos de menos de 50.000 habitantes.

Por último, o vicepresidente da Deputación de Pontevedra, César Mosquera, engadiu que nas súas visitas a Cádiz, da que confesou estar "namorado", viu a transformación impulsada no ámbito da mobilidade nos últimos anos. "V cosas sumamente interesantes, aínda que sen ter un programa concreto", asegurou, polo que recalcou que "hai que aprender de todos lados".

Rúa Rosalía de Castro en Pontevedra, até 2002 chamábase Salvador Moreno