Por Europa Press / Redacción | SANTIAGO DE COMPOSTELA | 20/01/2023 | Actualizada ás 16:03
A Confederación Intersindical Galega (CIG) denuncia que un 35,4% dos asalariados galegos cobra por baixo do salario mínimo interprofesional, contexto ante o cal reivindicará unha alza nas nóminas duns 101 euros ao mes.
En rolda de prensa, a central nacionalista presentou este venres as súas propostas para as negociacións colectivas deste ano, que se centran en cinco puntos de acción entre os que figura ese incremento salarial do 5%, que equivalería a un crecemento lineal duns 101 euros ao mes.
Así, segundo explicou o secretario confederal de negociación colectiva, Francisco González Sío, este aumento ten que ser igual ao IPC previsto, xa que de non ser así, advirte, produciríase unha perda de poder adquisitivo. O obxectivo destas liñas de acción, segundo destacou, ao seu lado, o secretario xeral da CIG, Paulo Carril, é a "loita" pola recuperación salarial nun contexto marcado pola carestía da vida e o avance da precariedade laboral.
Desta maneira, a partir da análise da situación sociolaboral da comunidade autónoma que se apoia no informe de salarios de 2022 elaborado polo seu gabinete técnico de economía, ambos os sindicalistas trasladaron outras actuacións como a esixencia dunha cláusula de garantía salarial vinculada ao IPC real.
De feito, expuxeron que no ano 2022, o 43% dos convenios recolleron esta cláusula, por tanto hai "moitas persoas traballadoras con convenio" que non tiveron este mecanismo de actualización e por tanto perderon poder adquisitivo, como mínimo de ata un punto porcentual, segundo as súas estimacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.