Activadas as alarmas na UE ao achar mutacións no brote de gripe aviaria nunha granxa de visóns de Carral
A Xunta di que, a día de hoxe, non houbo máis casos.
Por Europa Press / Redacción | SANTIAGO DE COMPOSTELA | 24/01/2023 | Actualizada ás 21:02
O brote de gripe aviaria nunha granxa de visóns en Carral comunicado o pasado mes de outubro e a raíz do cal foron sacrificados todos os exemplares --máis de 50.000-- acendeu as alarmas na rede de vixilancia europea tras acharse a presenza dunha mutación que xa estivo presente na pandemia da gripe porcina de 2009.
Así o reflicte un artigo da revista científica 'Eurosurveillance', publicada polo Centro Europeo para a Prevención e Control das Enfermidades, que no seu último número apunta á hipótese de que o virus puido saltar de aves silvestres aos mamíferos. Tamén dá por feito que, na explotación, mutou e pasou a contaxiarse entre os visóns.
Na explotación traballaban 12 persoas e ningunha estivo afectada polo virus, aínda que permaneceron en corentena. No marco da pandemia da covid-19, os traballadores da granxa utilizaban máscara.
Consultada por Europa Press, a Xunta apuntou que o caso se detectou tras a aparición na granxa de animais enfermos con sintomatoloxía respiratoria, así como un incremento anormal da mortalidade nela, polo que se tomaron mostras para o diagnóstico de varias enfermidades, entre elas a enfermidade provocada polo virus Sars-Cov-2, así como a influenza.
Como resultado destas análises, detectáronse dous casos positivos á influenza A (H5N1), que foron comunicados inmediatamente ás autoridades de Saúde Pública.
Tras recibirse os resultados, a granxa --que contaba con 8.369 femias reprodutoras e 43.617 crías destetadas-- foi inmobilizada polos servizos veterinarios oficiais da Consellería do Medio Rural, determinando a prohibición de entrada e saída de animais e doutros materiais que puidesen vehicular o virus, e o censado dos animais presentes.
Tamén se restrinxiu a entrada e saída de vehículos externos e de persoas alleas á explotación, ademais de levar a cabo o reforzo de todas as medidas de bioseguridade e de limpeza e desinfección, así como a adopción de medidas para minimizar o contacto do persoal da granxa cos visóns. Así mesmo, realizouse a correspondente enquisa para efectuar os oportunos estudos epidemiolóxicos.
A Xunta di que reforzou a vixilancia de explotacións avícolas e de visóns ao redor do foco e constata que, a día de hoxe, non houbo máis casos
