A CRTVG gaña máis de sete millóns en publicidade en 2022 e reduce a emisión de filmes "porque non funcionan ben"

O director xeral da CRTVG, Alfonso Sánchez Izquierdo, informou de que a Corporación tivo uns ingresos de 7,5 millóns de euros por publicidade en 2022, un 9% máis que os 6,9 millóns de 2021.

En resposta a unha pregunta do PPdeG na comisión parlamentaria da CRTVG, Sánchez Izquierdo valorou o crecemento de ingresos comerciais no últimos tres anos. Prevé que alcancen os 8 millóns de euros en 2023.

Apunta que o aumento se debe a diferentes cuestións como un cambio de bloques, un novo catálogo de formatos "moito máis adaptado" a anunciantes --con nichos para os que non teñen capacidade para anuncios a nivel estatal-- e cortes publicitarios máis axustados ás necesidades. Sánchez Izquierdo contrasta o crecemento que cultiva o ente público galego coa caída media do 6,6% do mercado en xeral.

No entanto, recoñeceu que, por capacidade de mercado da CRTVG, estes ingresos deberían roldar os 12 millóns de euros anuais, unha facturación "moi por baixo mentres estea tan perturbada a libre competencia no mercado, a pesar das reclamacións que se fixeron".

O CINEMA "NON FUNCIONA BEN"

Por outra banda nesta comisión, a deputada María González Albert (BNG) denunciou que "practicamente non existe cinema en galego" na TVG, "relegado" a emisións "á unha da mañá", con apoios que "cada vez son menores".

Respecto diso, Sánchez Izquierdo expuxo que en 2022 emitíronse 82 títulos de cinema galego, con 135 pases, que sumaron case un millón de espectadores.

Paralelamente, a CRTVG apoiou a produción de 11 films en 2022, sete películas e catro longametraxes documentais. Algúns dos exemplos que citou foron os 150.000 euros que se achegaron tanto para 'Sica' --seleccionada na Berlinale deste ano-- como para 'Máis Cuñados' --secuela de 'Cuñados'--. De cara a 2023, haberá 1,2 millóns de euros para investimentos en cinema galego.

Iso si, Sánchez Izquierdo recoñeceu que o cinema "ten dificultades e problema de audiencia", salvo éxitos como os de 'Cuñados' e 'O que arde'. Por iso, apunta que se emite en horario que define como "segundo 'prime time".

Asegura que o cinema "non funciona ben" na CRTVG, pero "non funciona ben en xeral", algo que ten que ver "moitísimo" con que a "xente adoitouse a ver as películas en plataformas"