Estas son as causas que están detrás dos accidentes mortais rexistrados nas estradas pontevedresas no 2022
Faleceron 18 persoas, sete no accidente de autobús
Por Europa Press / Redacción | SANTIAGO DE COMPOSTELA | 07/02/2023 | Actualizada ás 17:46
A subdelegada do Goberno en Pontevedra, Maica Larriba, presentou este martes o balance de seguridade viaria da provincia relativo ao ano 2022, no que faleceron nas estradas pontevedresas 18 persoas. De todas elas, sete morreron no accidente do autobús que caeu ao río Lérez, en Cerdedo-Cotobade, na noite do 24 de decembro.
Larriba cualificou este balance como "agridoce", xa que este número "é o máis baixo do últimos catro anos". "Aínda que os datos son bos en canto a vítimas mortais e o computo do número global de accidentes, temos que lamentar o tráxico sinistro de Noiteboa", manifestou.
Nesta comparecencia, a subdelegada estivo acompañada pola xefa provincial da Dirección Xeral de Tráfico, Paula Yubero. Ambas deron conta deste balance anual no que a cifra de feridos graves foi de 87 persoas, igual á rexistrada en 2021.
O número de sinistros nos que se rexistrou algunha vítima, xa sexan feridos leves, graves ou falecidos, experimentou un "moi lixeiro ascenso con respecto aos anos 2020 e 2021". Os usuarios vulnerables --peóns, ciclistas e motoristas-- supuxeron no 2022 o 28 % das vítimas mortais en accidentes de tráfico, unha porcentaxe similar á do ano anterior, pero sensiblemente inferior á cifra rexistrada en 2020 (38%) e 2019 (41%).
Maica Larriba sinalou como un "dato positivo" esta redución do número de usuarios vulnerables no cómputo das vítimas mortais, xa que o ano pasado foron 5 os usuarios vulnerables falecidos, unha cifra inferior aos 7 de 2021 ou os 10 de 2019.
SAÍDAS DE VÍAS
Respecto das causas dos accidentes con vítimas mortais, o balance recolle que as saídas de vías están detrás do 89 % dos sinistros mortais, mentres que a colisión frontal ou frontolateral é a segunda máis común, nun 8 % dos casos.
En relación a tipoloxía dos accidentes con falecidos, o 50% das vítimas no 2022 eran os condutores, unha porcentaxe inferior ao do 2021, ano no que os condutores supuxeron o 72% das vítimas mortais.
Por outra banda, a maior parte dos accidentes mortais séguense producindo entre as 7,00 e as 20,00 horas. Con todo, o accidente do autobús de Cerdedo-Cotobade variou estatisticamente este horario, ampliándoo ata as 00,00.
CASCO, CINTO E VELOCIDADE
Atendendo ao uso dos sistemas de seguridade, a subdelegada destacou que o cinco falecidos en moto facían uso do casco regulamentario. O 75% das vítimas mortais tamén cumpría co normativa respecto ao uso do cinto de seguridade e os sistemas de retención infantil.
A subdelegada informou que "o exceso de velocidade está presente no 30,43 % dos sinistros, unha cifra case sete puntos por encima da media de Galicia" En relación aos factores concorrentes nos accidentes con vítimas na provincia, as distraccións ao volante só están presentes no 13% dos sinistros, cando no caso de Galicia esta porcentaxe elévase ao 23%.
ALCOL
Así mesmo, a presenza de alcol nos sinistros con vítimas "tamén é dous puntos inferior na provincia con respecto a Galicia". Neste sentido, a subdelegada apuntou que o 2,47% das alcoholemias realizadas pola Garda Civil nas estradas pontevedresas foron positivas. Unha cifra que ascende ao 55,96% no caso dos controis de drogas.
No tocante aos controis que se realizan despois de ocorridos os accidentes, estes revelaron que "o 5,79 % dos condutores consumiran alcol previamente, e unhas 22,8 % drogas". Tanto o parque de vehículos da provincia como no censo de condutores incrementáronse o pasado ano en 1,4 puntos respecto ao 2021. Na actualidade, hai na provincia 761.938 coches, sendo os 73,1% turismos. As persoas con licenza de condución alcanzan as 607.400.
