Por Galicia Confidencial | Compostela | 29/12/2014 | Actualizada ás 08:00
O fomento da natalidade é un dos obxectivos prioritarios para o Goberno de Feijóo. Non é a primeira vez que o presidente galego recoñece que o país ten un problema de envellecemento e, razón non lle falta, xa que, segundo as estatísticas dentro de dez anos a poboación de máis de 65 anos representará un cuarto da poboación.
En abril de 2013 a Xunta aprobou en Consello o Plan de dinamización demográfica para frear o crecemento vexetativo negativo da poboación galega, cunha poboación moi avellentada e onde se segue producindo unha forte emigración da xente máis nova. Sen embargo, a principal medida para erradicar esta situación, a falla de políticas sólidas, é a da publicidade institucional. Un diñeiro que, na maior parte das ocasións, acaba nos bulsos dos grandes medios de comunicación e serve para tapar os seus buracos financieiros.
E é que a Xunta gastou en dous anos máis de 1,5 millóns de euros en campañas publicitarias para fomentar a natalidade. Desde o 2013, destinou 508.132,94 euros, 263.553,72 e 495.867,77 en distintas campañas. Un diñeiro ao que se suman outros 600.000n euros para contratar unha nova campaña publicitaria de dinamización demográfica para 2015.
Nos contratos adxudicados en 2013 e 2014 a baixa na oferta non chegou nin ao 4%, segundo denuncia a CIG-Autonómica. “Unha cantidade que puidera ter sido adicada directamente a dinamización demográfica mediante a potenciación dos servizos sociais públicos, como por exemplo, as garderías”, indicou.
Por iso, critica este tipo de campañas publicitarias e suliña que os empregados públicos da Xunta preocúpanse por “ver esta clase de gastos nos que se di que se fai ou que se vai facer sen que realmente sexa certo ou que haxa detrás o investimento público necesario para conseguilo”. “Nestes casos, existe unha desproporción evidente entre o que se gasta en publicidade e a inversión real que despois aparece detrás”, engade. Neste sentido, pide que non se detraian máis cartos dos servizos públicos galegos para esta clase de campañas publicitarias “desproporcionadas cuxo único obxectivo resulta ser a autopromoción do goberno da Xunta”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.