O PPdeG sinala que a Lei do só sí rebaixou en 65 anos o tempo de condena a agresores sexuais
María Antonia Rilo tacha de "esperpento" a lei e di que " as mulleres non preocupan o máis mínimo á ministra de Igualdade"
Por Europa Press / Redacción | OURENSE | 17/02/2023 | Actualizada ás 20:41
A secretaria xeral do PPdeG, Paula Prado, participou este venres en Ourense nunha concentración en contra da Lei de só si é si, unha norma que, asegurou, rebaixou xa en 65 anos o tempo de condena de agresores sexuais en Galicia.
Durante a protesta, Prado lembrou que Ourense é a provincia galega na que máis agresores foron postos en liberdade pola aplicación desta norma, un total de tres, dixo a secretaria xeral, así como oito rebaixas de pena que suman "máis de 13 anos menos de cárcere para condenados por delitos sexuais".
Por iso, Paula Prado reclamou ao Executivo central que "pida perdón ás vítimas" por esta lei porque, apuntaron, "a dor das vítimas está por encima das ideoloxías e dos sectarismos". En toda Galicia, Prado cifrou en "máis de corenta" o número de delincuentes sexuais beneficiados por esta lei, o que "se traduce en 65 anos de condena rebaixados na comunidade" por unha "chapuza lexislativa" que "ten nefastos efectos nas vítimas".
O número dous dos populares galegos criticou que "Pedro Sánchez preferiu seguir adiante coa lei e botarlle a culpa aos xuíces" e lembrou que o PP rexistrou no pasado mes de decembro unha proposición non de lei, na Cámara Baixa, para modificar esta norma.
"O goberno enrédase en pelexas internas no canto de solucionar o problema", afeou a popular, ofrecendo o voto dos populares para "acabar canto antes coa cadea de rebaixas de condenas", que son "máis de 500 en toda España".
UN "ESPERPENTO"
Paula Prado do Río estivo acompañada pola vicesecretaria de igualdade do Partido Popular de Ourense, María Antonia Rilo, quen, pola súa banda, aseverou que "hai razóns máis que suficientes para saír á rúa" contra "este despropósito de lei" que cualificou de "esperpento", criticando que "está redactado por quen se autoproclaman únicos defensores do feminismo".
A responsable de Igualdade dos populares ourensáns mostrou o seu apoio ás vítimas dos condenados na provincia por delitos sexuais que viron rebaixadas as súas penas e lamentou que "a nova norma devolveu o sufrimento ás vítimas".
Indo máis aló, Rilo denunciou que "é obvio que as mulleres non preocupan o máis mínimo á ministra de Igualdade" e apuntou a Pedro Sánchez insistindo en que "só se preocupou por corrixir a lei nos seus tempos, cando constatou o evidente custo en votos que tería".
