Balance das probas de alcolemia do Entroido en Ourense: só o 2% derivaron en sanción
Unha persoa foi denunciada por levar o uniforme oficial da Policía Local de Sanxenxo
Por E.P. | Ourense | 22/02/2023 | Actualizada ás 14:23
A Garda Civil de Ourense levou a cabo un total de 4.051 probas de alcolemia durante os controis realizados con motivo das festas de entroido en toda a provincia, nos que se detectaron 91 infraccións por superar a taxa permitida, en dez dos casos con niveis por encima de 0,60 miligramos de alcol por aire aspirado, limiar para ser considerado un delito contra a seguridade viaria.
Nun comunicado, a Garda Civil resalta unha tendencia á baixa no número de alcolemias e tamén pon o foco en que non se produciu ningún accidente de circulación con vítimas. Ademais, practicáronse 38 probas de drogas, das cales, máis da metade foron positivas nalgún estupefaciente.
CIDADE DE OURENSE: USO INDEBIDO DO UNIFORME E CONDUCIÓN TEMERARIA
Tamén difundiu un balance das festas a Policía Local de Ourense, que formulou entre xoves e martes un total de dez denuncias por alcolemia ao volante, unha delas en modalidade de delito contra a seguridade, así como outro sete por positivo no test de drogas.
Ademais, unha persoa foi denunciada por uso indebido dun uniforme oficial ao levar posto un traxe de Policía Local con distintivos do municipio pontevedrés de Sanxenxo.
Doutra banda, un mozo de 22 anos veciño de Castro Caldelas foi detido por condución temeraria e atentado aos axentes que tiveron que interceptalo tras darse á fuga cando circulaba pola rúa Salvador de Madariaga. Por outra banda, outro home, de 41 anos e veciño de Ourense, foi sorprendido por un viandante cando tentaba forzar a porta dun bar cunha muleta e unha tesoira. O individuo deuse á fuga e foi interceptado máis tarde por unha patrulla da Policía Local.
