Por Galicia Confidencial | Compostela | 06/03/2023 | Actualizada ás 11:20
O Sindicato de Estudantes e a Asociación Feminista Libres e Combativas convocan manifestacións de estudantes este mércores 8 de Marzo no marco da Folga Estudantil Feminista convocada polo Sindicato de Estudantes en tódolos institutos e Universidades do Estado.
As protestas terán lugar ás 12h en Vigo, Ferrol e A Coruña. Entre os motivos da convocatoria, o aumento das vítimas da violencia de xénero. "Estamos fartas de que, a pesar das leis e das declaracións do Goberno estatal do PSOE-UP, a violencia contra as mulleres non cese", critican.
"Pode parecer contraditorio que esta escalada de asasinatos se produza cando máis leis
feministas se están a tramitar. Pero non o é. Para acabar co machismo non abonda con denunciar a súa existencia ou simplemente modificar a lexislación. Hai que ir á raíz do problema, a opresión económica, ideolóxica e de xénero que provoca o capitalismo,e enfrontarse á extrema dereita, á Igrexa católica e aos franquistas que infestan as institucións", indican nun comunicado.
Tamén a asociación PETRA Maternidades Feministas Galiza sae ás rúas para esixir medidas para unha crianza digna. "Este 8 de marzo as nais feministas volvemos saír ás rúas para visibilizar as nosas maternidades e esixir unha crianza digna. Unha maternidade libre e elixida, que hoxe é posible grazas á loita feminista pola anticoncepción e o dereito ao aborto libre, gratuíto e seguro", indica nun comunicado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.