Así contaminan os antibióticos animais ás terras agrarias

Investigadores do grupo Unidade Xestión Ambiental e Forestal Sostible do Campus Terra da USC estudan os efectos ambientais que pode provocar a contaminación derivada do uso de antibióticos ionóforos, uns fármacos moi tóxicos para os humanos e que só se usan en veterinaria, chegando a liberarse por feces e ouriños ata un 90% do composto administrado. 

Así, acaba na fosa dos xurros e chega o solo mediante a aplicación destos residuos como fertilizantes, podendo acadar posteriormente as augas e cultivos. Nesta liña, os antibióticos ionóforos usados en produción animal acaban concentrados nos xurros, que logo se empregan en áreas de cultivo, relata Álvarez. O proxecto ten un período de execución de tres anos, segundo indica a coordinadora e investigadora principal do proxecto, Esperanza Álvarez.

O obxectivo pasa por facer un diagnóstico sobre a presenza destes contaminantes emerxentes en xurros, solos e cultivo, estudar o seu comportamento no solo (degradación, retención), o efecto sobre os microgroorganismos e propoñer medidas de control para evitar o seu paso á cadea trófica utilizando subproductos da industria forestal (cinzas de combustión de madeira, corteza de piñeiro) e agroalimentaria (cuncha de mexillón) que actúen como bioadsorbentes destes fármacos.

Álvarez indicou que a primeira fase deste proxecto centrarase na análise de xurros, solos e diferentes cultivos de diferentes comarcas de Galicia de gandería e agricultura intensiva para coñecer o grao de concentración por este tipo de substancias, así como para determinar os efectos negativos sobre a actividade microbiana do solo.

Unha vez recompilados estes datos respecto das propiedades e do comportamento dos solos, os investigadores comprobarán se algúns materiais residuais/subproductos tales como cuncha de mexillón, cortiza de piñeiro ou cinzas de biomasa, poden actuar como bioadsorbentes e controlar a contaminación derivada dos antibióticos ionóforos.