A folga de médicos colle folgos nesta segunda xornada, cun aumento da participación
O paro obriga a suspender outras 173 cirurxías e máis de 5.000 consultas na quenda de mañá, un cuarto da media habitual
Por Europa Press / Redacción | SANTIAGO DE COMPOSTELA | 12/04/2023 | Actualizada ás 19:07
As cifras de seguimento da folga que ofrecen a Confederación Estatal de Sindicatos Médicos (CESM) e o Servizo Galego de Saúde (Sergas) volven diferir, pero coinciden en que a participación é máis elevada este mércores que o martes.
En concreto, o Sergas estima que o seguimento global da folga de médicos na mañá desta segunda xornada foi do 15,75%, unha cifra maior ao 14,26% que deu o martes. Tamén é superior en Atención Primaria, situada este mércores no 5,73%.
Por áreas sanitarias, a de Vigo volveu a ser a que máis participou na folga convocada en solitario pola CESM, cun 22,7% na quenda de mañá. Seguen a esta a da Coruña-Cee (16,78%), Ourense-Verín-O Barco de Valdeorras (16,04%), Lugo-A Mariña-Monforte (13,83%), Santiago-Barbanza (12,78%), Pontevedra-O Salnés (12,06%) e Ferrol (11,85%).
Tamén os datos da tarde deste mércores, segundo o Sergas, son máis elevados ao situarse no 5,36% no total de Galicia, máis dun punto por encima que na mesma franxa que hai un día (4,04%).
Por áreas sanitarias, na tarde deste mércores o seguimento liderouno a de Lugo-A Mariña-Monforte, co 10,17%, seguida da de Ferrol co 7,83% e da da Coruña-Cee co 6,39%. Á cola situáronse Vigo (4,13%), Ourense-Verín-O Barco de Valdeorras (3,7%), Santiago-Barbanza (3,23%) e Pontevedra-O Salnés (2,46%).
En paralelo, subiron as cirurxías, consultas externas e probas que estaban programadas para a quenda de mañá e que tiveron que ser anuladas. Mentres que na mañá do martes, primeira xornada do paro, suspendéronse 163 cirurxías (o 26,21% sobre a media), na deste mércores foron 173 (o 27,81%).
No que respecta ás consultas externas aprazadas, de 4.598 na mañá do martes (23,32%) pasaron a 5.141 na do mércores (26,07%). Mentres tanto, suspendéronse 398 probas na mañá do martes (2,88%) e 425 na deste mércores (3,07%).
DATOS DE CESM
Pola súa banda, a CESM eleva ao 62% o seguimento da folga este mércores, dous puntos por encima á xornada do martes. A organización considérao un "importante avance" e pon o foco en que "hai moitos facultativos que se atopan en servizos mínimos e comparten estas reivindicacións" pero "non poden sumarse".
Por áreas, de acordo co sindicato, Ourense alcanzou o 86%, Vigo o 75%, Santiago o 70%, Ferrol o 65% e A Coruña o 55%. Con inferiores datos, pero cun aumento, estiveron Lugo (45%) e Pontevedra (38%).
As principais mobilizacións convocadas pola CESM para este mércores foron en Lugo, con concentracións tanto no Hospital Universitario Lucus Augusti (HULA) como no comarcal de Burela.
