O novo Bono Comercio da Xunta poderá utilizarse desde o 15 de maio

A Xunta destina 2,5 millóns de euros a un novo Bono Activa Comercio que se poderá utilizar desde o próximo 15 de maio. O vicepresidente primeiro e conselleiro de Economía, Industria e Innovación, Francisco Conde, detallou este venres nunha visita a varios establecementos de Santiago que os comercios participantes van poder adherirse ao programa a partir do próximo martes.

Segundo trasladou a Consellería, durante esta visita o conselleiro afirmou que o obxectivo da medida é "seguir mantendo e reforzar o vínculo das familias cos comercios locais", ademais de pór en valor "o servizo e a calidade do pequeno comercio e traballar conxuntamente para consolidar as vendas".

A Xunta estima que esta terceira edición do Bono Activa Comercio permitirá mobilizar 8,5 millóns de euros en vendas. A finalidade desta iniciativa é contribuír para reducir o impacto da inflación nas familias, ademais de fortalecer o comercio local.

VALORES E PRAZOS

As persoas consumidoras poderán descargar na web www.bonosactivacomercio.gal este bono desconto de 30 euros para as compras que realicen nos comercios adheridos. Nas compras iguais ou superiores a 20 euros e menores de 30 obterán un desconto de 5 euros, mentres que a rebaixa chega a 10 euros para as compras entre 30 e 50 euros. A partir desta cantidade, o desconto alcanzará 15 euros.

Os bonos estarán dispoñibles para a descarga entre o 15 de maio e o 15 de setembro, salvo que se esgote o orzamento do programa.

O vicepresidente primeiro e conselleiro de Economía, Industria e Innovación, Francisco Conde, visita diferentes establecementos comerciais para informar da nova edición do programa Bono Activa Comercio | Fonte: XUNTA