42 espectáculos e 38 narradores marcarán o Festival Atlántica
Esta edición, busca "conservar" e facer de Galicia "un mar de contos". Desenvolverase do 1 ao 9 de xullo en Galicia e Portugal.
Por Europa Press / Redacción | Santiago de Compostela | 13/06/2023 | Actualizada ás 13:19
A undécima edición do Festival Atlántica de narración oral chegará a 24 concellos de Galicia e, por primeira vez, a Portugal, con 42 espectáculos de 38 narradores. A edición foi presentada este martes en Santiago de Compostela pola directora de Atlántica, Soledad Felloza, o director xeral de Cultura da Xunta, Anxo Lorenzo, e polo deputado de Cultura da Deputación da Coruña, Xurxo Couto.
No acto, Felloza explicou que a proposta para este ano é "conservar", por iso no seu cartel hai unha lata de conservas. "Hai xente que é de conservar ideais, soños, de conservarse ben, pero nós decidimos conservar memoria", detallou. Así, indicou que este ano decidiron "ser clásicos, permanecer e conservar", pero que os espectáculos si que van ser innovadores e haberá pezas que se estreen por primeira vez en Galicia.
O deputado de Cultura da Deputación da Coruña, definiuno como un festival "singular e único", á vez que puntualizou sobre a importancia que ten para a "descentralización da cultura". "Que non quede nas cidades grandes, senón que percorra todos os recunchos de Galicia", esgrimiu.
O FESTIVAL
O festival, que terá lugar do 1 ao 9 de xullo, celebrarase en Santiago de Compostela, Ferrol, Teo, Outes, Mugardos, A Pobra do Caramiñal, Ribeira, Alfoz, Boiro, Cuntis, Dodro, Mondoñedo, A Coruña, Ourense, Vigo, Sanxenxo, Pobra de Trives, Brión, Carnota, Castro de Rei, Chantada, Paderne, Rianxo, A Estrada e, por primeira vez chega a Portugal, a Pitões Dás Júnias.
En total haberá 38 narradores, procedentes de Portugal, Cuba, Cataluña, Zamora e Galicia, con historias para públicos de todo tipo. Con todo, no programa figuran "dúas estreas absolutas e cinco estreas en España", así como varias pezas que se escoitarán por primeira vez en Galicia.
