As condicións meteorolóxicas obrigan a prohibir desde este sábado as queimas agrícolas e forestais
Non se darán máis permisos e os xa concedidos quedarán en suspenso a partir deste sábado, día 24 de xuño.
Por E.P. | SANTIAGO DE COMPOSTELA | 24/06/2023 | Actualizada ás 11:07
A partir deste sábado, día 24 de xuño, están prohibidas as queimas de restos agrícolas e forestais realizadas por particulares en Galicia debido ás condicións meteorolóxicas. Diso informou a Consellería do Medio Rural nun comunicado, no que precisa que quedan excluídas desta prohibición as queimas controladas que executa o Servizo de prevención e defensa contra os incendios.
O departamento autonómico explicou que isto implica que non se darán máis permiso e que os xa concedidos quedarán en suspenso a partir deste próximo sábado. A decisión tomouse tras avaliar a evolución da situación meteorolóxica e unha vez analizados ao detalle os diferentes indicadores técnicos que inciden no risco de incendio.
A Consellería de Medio Rural pediu colaboración á cidadanía para que extreme as precaucións e denuncie calquera actividade delituosa incendiaria da que teña coñecemento, dado que desde este sábado e ata novo aviso non está permitido o uso do lume para ningunha actividade agrícola e forestal. Ademais, lembra que está a disposición da cidadanía o número de teléfono gratuíto 085, ao que chamar en caso de detectar algún incendio forestal.
