A Airef estima que Galicia crecerá menos que a media do estado, un 1,4% do PIB
A media estatal do segundo trimestre será de 1,8%.
Por Europa Press / Redacción | SANTIAGO DE COMPOSTELA | 31/07/2023 | Actualizada ás 16:03
A Autoridade Independente de Responsabilidade Fiscal (Airef) estima que o PIB de Galicia crece un 1,4% no segundo trimestre do ano en comparación co mesmo período de 2022, o que supón menos do 1,8% da media española.
Segundo o informe publicado este luns, a Airef prevé que Baleares (3,6%), Canarias (3,1%), Madrid (2,1%) e Cataluña (1,8%) sexan as catro autonomías que máis crezan en taxas interanuais, por encima da media nacional do 1,8%.
Por baixo da media española, prevé que se sitúen Andalucía (1,7%); Murcia e Castela-A Mancha (1,6%); Navarra (1,5%): Castela e León, Galicia e Comunidade Valenciana (1,4%); Estremadura e Aragón (1,3%); País Vasco e A Rioxa (1,1%); Cantabria (0,8%) e Asturias (0,8%).
En taxas de variación intertrimestrales --entre o segundo e primeiro trimestre de 2023--, o crecemento de Galicia é do 0,4%, un dato idéntico neste caso á media do país. Tamén Baleares e Canarias destacan pola súa expansión, con crecementos do 1,1% e do 0,9%, respectivamente. En contraposición, País Vasco e Asturias rexistraron os menores avances, con taxas do 0,2% e 0,1%, respectivamente.
Estas estimacións da AIReF realízanse unha vez o INE publica o dato de avance trimestral do PIB de España. No entanto, o organismo lembra que as previsións se fan nun contexto de elevada incerteza no ámbito territorial.
