A Deputación de Ourense pide aos participantes nas Xornadas de Folclore que divulguen nos seus países o potencial da cidade
Os participantes nesta 38 edición proceden de Sudáfrica, Arxentina, Bolivia, Ecuador, Tahití e Ucraína.
Por E.P. | OURENSE | 10/08/2023 | Actualizada ás 19:29
O presidente da Deputación de Ourense, Luís Menor, recibiu este xoves aos participantes na 38 edición das Xornadas de Folclore, a quen lles pediu que contribúan a divulgar nos seus países o potencial da provincia.
Procedentes de Sudáfrica, Arxentina, Bolivia, Ecuador, Tahití e Ucraína, estes grupos protagonizaron a recepción oficial no Salón de Plenos da Deputación, onde Menor lles agradeceu o seu compromiso pola Cultura.
"Gustaríame que cando regresedes aos vosos países poidades contar e explicar como sentimos aquí a música e o baile. E tamén, por suposto, explicarlles que Ourense é parte inseparable do mundo das culturas e as tradicións. Sabémolo moi ben como pobo emigrante que fomos", indicou o presidente provincial.
Menor animou aos participantes nas xornadas a que coñezan e gocen de Ourense e de todo o que a provincia ofrece. "Ninguén entendería Ourense e Galicia sen a nosa música e os nosos bailes. Por iso tamén comprendemos o que significa o folclore para vós", engadiu o responsable do ente provincial.
Tras a visita deste xoves a Manzaneda e ao Carballiño, as Xornadas de Folclore continúan este venres cun acto especial en homenaxe a George Ofilant, director da agrupación folclórica surafricana, falecido en Ourense, ademais doutras actividades.
