Feijóo loita contra os espíritos aventureiros

Estes días os administradores dalgúns medios xa fan preparativos para estar á altura do reto lanzado polo Goberno galego, que ven de anunciar unha campaña contra os espíritos aventureiros que prexudican o prestixio e o futuro de Galicia.

Por Félix Soria | A Coruña | 14/05/2015

Comparte esta noticia
Proba da importancia do proxecto son os dous millóns de euros ca Xunta investirá para compensar o esforzo das emisoras e xornais que teñan a honra de ser elexidos. 
O feito de que Núñez Feijóo teña decidida a convocatoria diante das urnas non é o máis salientable da nova, pois non é a primeira vez que a providencia emparella a vontade de arranxar un problema cunhas eleccións (outras cousas non, pero na Galicia están normalizadas as casualidades). O máis salientable da nova é o obxectivo.
 
Segundo o anuncio oficial, a Xunta investirá eses dous millóns en demostrar que Galicia «é unha terra na que confiar, tanto pola calidade das súas xentes, como pola calidade e capacidade competitiva…»
 
A campaña é revolucionaria, pois o beneficiario desa promoción da economía galega é a poboación galega, que na súa maioría ignora as avantaxes de vivir nun país onde as oportunidades de arranxar o futuro que teñen os asalariados, autónomos e empresarios se contan por milleiros, segundo terían comprobado os expertos do Goberno que preside Feijóo.
De feito, eses galegos que sinalan ás urnas para explicar a decisión de investir eses dous millóns e negan a providencia como creadora das casualidades, constitúen o sector da poboación máis necesitado de recibir información do futuro que lles espera na porta das súas casas.
 
As emisoras e xornais elexidos, coa RTVG á fronte, non aforrarán coñecementos científicos, económicos, históricos, sociolóxicos, culturais e tamén xeolóxicos para demostrar que os cidadáns que emigran na procura de traballo e oportunidades o fan porque son espíritos aventureiros.
 
Que vexamos con claridade o erro de quen se deixa levar polo seu espírito aventureiro require ductilidade, motivo polo que compre dar por seguro que o Consello da Xunta confiará nos medios que xa demostraron ter esa propiedade [a dos metais que se deforman sen romper] co gallo do baleirado e afundimento das caixas de aforros, por poñer un exemplo…

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Félix Soria Félix Soria (Lugo, 1953) é xornalista e reside na Coruña desde o 2001. Estudou Filosofía e Letras e Dereito en Barcelona, onde viviu 28 anos, e tamén en Andalucia, Bélxica, Castela e Francia. Traballou ou colaborou con medios cataláns, andaluces, galegos e unha axencia francesa. Como xornalista, especializouse en información local, económica, xeopolítica e da Unión Europea, como correspondente en Bruxelas durante 6 anos. É o administrador do blogue http://im-pulso.blogspot.com.es/