Precísanse doantes dos grupos sanguíneos A+ e 0-, cuxas reservas permanecen baixas

A Axencia de Doazón de Órganos e Sangue (ADOS) realizou un chamamento xeneralizado á participación da poboación galega na doazón de sangue e, de forma especial, aos doantes dos grupos A Positivo e 0 Negativo. Nun comunicado, a Consellería de Sanidade explica que as reservas destes grupos presentan niveis baixos, polo que é necesario reforzar o permanente chamamento á participación nas campañas de doazón que realiza a través de ADOS.

O departamento autonómico lembrou que os hospitais galegos necesitan entre 400 e 500 doazóns diarias para desenvolver de forma eficaz o labor asistencial. Ademais, sinala que, aínda que en determinadas ocasións do ano pode baixar o número de doazóns, non ocorre o mesmo coa demanda de sangue e os seus derivados que necesitan os hospitais.

Por iso, indica que é imprescindible a xenerosidade e o altruísmo de toda a cidadanía, polo que ADOS solicita un esforzo especial para incrementar as reservas de sangue. Ademais, as distintas unidades móbiles da Axencia de Doazón de Órganos e Sangue visitarán, estes días, diferentes concellos galegos para conseguir as doazóns necesarias que garantan o desenvolvemento asistencial dos distintos centros sanitarios.

Pode doar sangue calquera persoa maior de idade, que pese máis de 50 quilos e que non padeza nin padecese enfermidades transmisibles polo sangue. As persoas que desexen máis información poden consultar a páxina web de ADOS, ados.sergas.gal; as súas redes sociais, e o teléfono gratuíto 900 100 828.

ADOS chama a doar ao permanecer baixas as reservas dos grupos sanguíneos A+ e 0- nos hospitais | Fonte: XUNTA