Un galego ten que empregar un terzo do seu salario para poder alugar unha vivenda de 65 metros cadrados
Esta análise baséase nos prezos medios da vivenda en aluguer do índice inmobiliario de Fotocasa e os datos dos soldos medios das ofertas de emprego da plataforma InfoJobs. Tendo en conta o salario bruto medio mensual de Galicia en 2022 rexistrado por InfoJobs (1.841 euros) e o prezo do metro cadrado da vivenda en aluguer en agosto de 2023 (8,46 euros/m2 ao mes), o galego medio podería alugar 65 metros cadrados de vivenda cos 552 euros.
Por Europa Press / Redacción | Santiago de Compostela | 21/09/2023 | Actualizada ás 15:33
En Galicia, cun terzo do soldo, só se podería alugar unha vivenda de 65 metros cadrados, é dicir, 15 metros cadrados menos que unha vivenda tipo, establecida en 80 metros cadrados, segundo o estudo 'Relación de salarios e a compra de vivenda' de Fotocasa. Esta análise baséase nos prezos medios da vivenda en aluguer do índice inmobiliario de Fotocasa e os datos dos soldos medios das ofertas de emprego da plataforma InfoJobs.
Isto supón que, tendo en conta o salario bruto medio mensual de Galicia en 2022 rexistrado por InfoJobs (1.841 euros) e o prezo do metro cadrado da vivenda en aluguer en agosto de 2023 (8,46 euros/m2 ao mes), o galego medio podería alugar 65 metros cadrados de vivenda cos 552 euros que supón destinar o 30 % do salario medio recomendado. Ademais, se un terzo do soldo bruto mensual equivale a 552 euros (65 m2 de vivenda), o galego medio necesitaría 125 euros para poder alugar os 80 metros cadrados que ten unha vivenda tipo en España.
PROVINCIAS
En Pontevedra, co 30 % do salario bruto mensual (equivalente a 543 euros), un residente pode alugar unha vivenda de 56 metros cadrados. Isto é, 24 metros cadrados menos que o tamaño estándar dunha vivenda en España. Para poder alugar unha vivenda de tamaño estándar en Pontevedra, un residente necesitaría engadir 228 euros ao orzamento, chegando a un total de 771 euros mensuais (xa que o prezo medio é de 9,64 euros/m2 ao mes). Doutra banda, en Ourense, co 30 % do salario bruto mensual (equivalente a 562 euros), un residente pode alugar unha vivenda de 86 metros cadrados. Isto é, 6 metros cadrados máis grande que o tamaño estándar.
HABITACIÓNS A ESTUDANTES
Por outra banda, o 35 % dos anuncios de habitacións en pisos compartidos na Coruña "explicitan a súa preferencia por convivir con estudantes", mentres que o 54 % dos anuncios solicitan que os novos inquilinos sexan traballadores, segundo un estudo de Idealista. No caso de Pontevedra, estas porcentaxes varían lixeiramente ao 37 % para estudantes e o 50 % para traballadores. En ambas as provincias o prezo non varía e, de media, sitúase en 290 euros. O informe non dispón de datos para as provincias de Ourense e Lugo.
