Alfonso Rueda no acto do PP contra a amnistía: "Estamos aquí para dicir que de ningunha maneira. Basta!"
Afirmou que a continuidade do socialista na Moncloa "non se pode negociar á conta dos galegos e doutras comunidades autónomas".
Por Europa Press / Redacción | SANTIAGO DE COMPOSTELA | 24/09/2023 | Actualizada ás 18:32
O presidente da Xunta e do PPdeG, Alfonso Rueda, censurou no acto do PP contra a amnistía, celebrado este domingo en Madrid, que o diñeiro que "está encima da mesa" na negociación de Pedro Sánchez para conseguir os apoios dos independentistas para a súa investidura "sairá do resto de comunidades autónomas" e afirmou que a continuidade do socialista na Moncloa "non se pode negociar á conta dos galegos e doutras comunidades autónomas".
Así o fixo durante un acto que asegurou que cumpriu "con todas as expectativas". Un evento que, en palabras de Rueda, demostrou que todos os alí presentes queren "a igualdade entre todos os españois".
O líder do PPdeG mostrouse "preocupado" polas informacións que transcenderon estes días sobre as negociacións do Goberno de coalición cos independentistas. "Noticias que estamos a coñecer estes días, non porque nolos conte Pedro Sánchez, que non conta absolutamente nada, senón porque o contan os independentistas que negocian a investidura. É para preocuparse moitísimo", esgrimiu.
Neste sentido, fixo referencia aos 450.000 millóns de euros que, asegurou, "pon encima da mesa" para "empezar a negociar" e que "van saír dalgún sitio". Por tanto, continuou, esa cifra sairá do que "lles corresponde lexitimamente" ao resto das comunidades autónomas. "A Galicia, que sempre foi leal ao Estado, que sempre fixo unha xestión económica adecuada, que nunca se endebedou máis aló do razoable e do que se puidese devolver", remarcou.
"CONTA A CERO Á CONTA DE TODOS"
"Todo o contrario do que pasou en Cataluña", afirmou Roda antes de engadir que Cataluña quere agora "pór a conta a cero á conta de todos", algo que, segundo Rueda, "non se pode permitir".
En contraposición, lamentou que en Galicia "hai moitas cousas" que se reclaman desde hai tempo, pero que durante o últimos cinco anos o Goberno central "negou case todo". "Desde logo vimos reclamar, non para quitarlle nada a ningún, desde logo non para deixar que agora, en moi poucos días e simplemente para seguir na Moncloa priviléxiese aos de sempre. Sempre se privilexia aos mesmos á conta dos outros. Nin máis nin menos, ademais, un prófugo da xustiza", indicou.
No referente a Galicia, sinalou que nestes momentos, no proceso de elaboración dos orzamentos, o Goberno central "non quere dicir canto corresponde" á administración autonómica galega.
"E iso é por algo", aseverou, "porque agora mesmo sabe que moito do que tería que dar" a Galicia "está a preparalo para dar a aqueles que lles van a pedir moito máis do que lles corresponde".
"Estamos aquí para dicir que de ningunha maneira. Basta! Desde logo á conta dos galegos e á conta doutras comunidades autónomas que están aquí non se pode negociar a continuidade de Pedro Sánchez", concluíu.
