O PSdeG reprocha a Rueda que non convocase aos eurodeputados galegos na súa visita a Bruxelas

O eurodeputado socialista galego, Nicolás González Casares, reprochou ao presidente da Xunta, Alfonso Rueda, que "incumprise" o seu "compromiso" de convocar aos representantes das forzas políticas galegas nas súas visitas a Bruxelas, onde se desprazou este mércores para participar no Comité Europeo das Rexións.

Nunha nota de prensa, o representante do PSOE subliñou que Galicia necesita "un presidente que una ás forzas políticas en defensa do país en Bruxelas" e non que "as divida". Así, lamentou que Rueda demostre que "non ten ningunha intención de fomentar o traballo conxunto, nin informando nin convocando aos eurodeputados galegos". Neste sentido, González Casares censurou a "miopía" e o "partidismo" que, ao seu xuízo, mostra o titular do Goberno galego e que, segundo afirmou, "son lesivos" para os intereses de Galicia.

Así, nun contexto no que, tal e como lembrou, a Comisión Europea está a piques de presentar a proposta do novo Marco Financeiro Plurianual, o eurodeputado socialista manifestou que os gobernos rexionais "poden perder peso na xestión dos fondos de cohesión" coa proposta do "PP europeo", mentres que os socialistas "oponse".

Por iso, sinalou que se o presidente da Xunta quere "frear esa proposta", debería "buscar aliados no segundo grupo da Eurocámara para desenvolver un traballo conxunto que pare propostas lesivas como as que defende o seu partido a nivel europeo". Doutra banda, reclamou a Alfonso Rueda que comprometa o uso de fondos comunitarios para a promoción de vivenda pública en Galicia aproveitando, dixo, a posibilidade de "reprogramación de fondos comunitarios que se abre coa revisión intermedia do Marco Financeiro Plurianual vixente".

EP Plenary session. ALEXIS HAULOT | Fonte: Europa Press