A Xunta di que non pode regular as vivendas turísticas e pídelle a Madrid que o faga

A Xunta solicitará ao Goberno central que regule as vivendas turísticas no marco da comisión bilateral aberta para resolver as dúbidas competenciais que Galicia ten sobre a implantación da nova lei estatal de vivenda.

Así o avanzou a vicepresidenta segunda da Xunta e responsable de Vivenda, Ángeles Vázquez, en declaracións aos medios antes de participar este venres na reunión do consello do Observatorio da Vivenda de Galicia, celebrada en Santiago.

O número tres do Executivo autonómico sinalou que están á espera de que o Goberno fixe a data para a celebración do primeiro encontro da comisión bilateral, cuxa creación foi publicada a mediados do mes de agosto a través da súa publicación no Boletín Oficial do Estado. Alí, a Xunta demandará que o Estado se encargue da regulación das vivendas turísticas, un asunto sobre o que o Observatorio da Vivenda elaborará un estudo.

Segundo remarcou Vázquez, a Xunta carece de competencias para regular as vivendas turísticas e, por tanto, debe ser o Goberno central quen se encargue dun asunto achega do que "algúns concellos deron un paso á fronte e outros están a esperar a que o faga alguén", polo que subliñou que "sería bo" que esa unificación de criterio partise da Administración central.

DECRETO HABITABILIDADE

Doutra banda, a vicepresidenta segunda tamén avanzou que a Xunta manterá unha serie de encontros nas principais cidades galegas "para que todas teñan o coñecemento necesario" sobre o novo decreto de habitalidade que, coa súa entrada en vigor a partir de mediados de outubro, flexibilizará a posibilidade de converter baixos comerciais en vivendas.

A preguntas dos medios, Vázquez sinalou que existe unha "gran expectación" sobre estes cambios, que obrigará aos concellos a "delimitar" as zonas onde esta flexibilización dos criterios de habitalidade será posible

Ángeles Vázquez no pleno do Parlamento de Galicia | Fonte: XUNTA