Máis de 100 bebés foron inmunizados contra o virus respiratorio sincitial nos primeiros días na área sanitaria Santiago-Barbanza

Máis de 100 bebés foron inmunizados ata este venres contra o VRS na área sanitaria de Santiago de Compostela e Barbanza na campaña que comezou o pasado luns 25 de setembro. En concreto, segundo trasladou a área sanitaria, ata o mediodía deste venres foron inmunizados un total de 112 bebés aos que haberá que sumar os que acudan durante a tarde dos 20 citados no Hospital Clínico.

Ante estas cifras, a xerencia compostelá mostrou a súa satisfacción por esta acollida, xa que "practicamente o 100 % dos bebés que estaban en disposición de recibila foron inmunizados". Nunha nota de prensa, destacou que Galicia foi a primeira comunidade en aprobar a inclusión deste anticorpo no seu calendario de vacinación, do que a Xunta adquiriu 15.500 doses. O Virus Respiratorio Sincitial (VRS) é o causante da bronquiliotis, unha enfermidade que provoca ata 1.000 hospitalizacións en Galicia cada ano.

Xunto cos recentemente nacidos nos hospitais composteláns e de Ribeira, tamén foron vacinados nesta primeira semana, nas consultas externas do hospital Clínico santiagués, os nenos prematuros (nacidos desde o 1 de outubro de 2021), e os nenos de alto risco (con cardiopatías, displasia broncopulmonar, entre outras patoloxías) con menos de 24 meses. A partir do próximo luns día 2 e ata o 15 de outubro están citados no Hospital Clínico e no Hospital de Barbanza todos aqueles nenos e nenas que naceron desde o pasado 1 de abril de 2023.

VACUNA GRIPE

Ademais, esta semana tamén comezou a campaña de vacinación fronte á gripe e o covid-19 nas residencias sociosanitarias e centros de persoas con discapacidade. Así, foron vacinadas estes días máis de 1.000 persoas residentes en 14 dos centros situados no ámbito de influencia desta área sanitaria.

Ata o próximo día 13 de outubro os dous equipos de enfermaría composteláns continuarán coa programación para acudir ás preto de 30 residencias que lle restan. O equipo de enfermaría de Barbanza xa completou esta primeira semana, coa vacinación de 360 residentes, nos seis centros da súa contorna, situados nos concellos de Ribeira, Noia, A Pobra do Caramiñal e Boiro.

Tras completar a vacinación nas residencias, o próximo 16 de outubro está previsto estender a campaña ao resto da poboación diana desta campaña, e terá lugar tamén a apertura dos grandes recintos de vacinación. Así, a Consellería de Sanidade citará á poboación diana (vía SMS) con 4 ou 5 días de antelación.

Un bebé sendo inmunizado este venres | Fonte: XUNTA