A alcaldesa de Santiago critica ao PP local por situarse na "confrontación"

A alcaldesa de Santiago, Goretti Sanmartín, reprochou ao líder do PP compostelán, Borja Verea, que se sitúe "na confrontación" e en "ditarlle ao presidente da Xunta as súas respostas".

Nunha mensaxe nas súas redes sociais, a rexedora cualificou de "chocante" que o portavoz dos populares "non estea para defender os intereses de Santiago" e "se adique a cuestionar ata o que Manuel Fraga xa admitiu, situando a achega á capitalidade en máis de cinco millóns de euros daquel tempo".

Así se manifestou Goretti Sanmartín despois de que este venres Verea acusase á nacionalista de converter o consistorio en "unha arma de ataque constante contra a Xunta" ao "pór en risco proxectos craves" para a cidade coa súa actitude de "confrontación e de unilateralidade". Con todo, Sanmartín apunta que "afortunadamente, o diálogo e a colaboración sempre foron o principal nas relacións entre o Concello e a Xunta".

"Esa é a nosa vontade e o noso obxectivo. Seguro que o presidente da Xunta tamén quererá estar á altura e non se deixará guiar por outros intereses. Santiago necesita e merece acordos", conclúe Sanmartín.

A alcaldesa de Santiago, Goretti Sanmartín, á súa chegada á tradicional ofrenda ao Apóstolo / César Argina - Europa Press - Arquivo / Europa Press

PSOE

Pola súa banda, o PSOE de Santiago pediu á alcaldesa da capital galega, Goretti Sanmartín, que priorice no seu encontro co presidente da Xunta, Alfonso Rueda, temas como o aparcadoiro do Hospital Clínico, o problema da vivenda e a implantación da taxa turística.

Ademais, os socialistas composteláns reclámanlle á alcaldesa que acuda a este encontro, que se celebrará o luns, con "espírito colaborativo". "É fundamental, como capital de Galicia que somos, que o Concello e a Xunta traballen da man con lealdade institucional e cordialidade, evitando unha confrontación que nada achega para a cidade", sinalou o edil Sindo Guinarte.

Así mesmo, o PSOE compostelán móstrase "moi crítico" co que considera "un excesivo bombo mediático" desta reunión e ironiza entre as "expectativas que a alcaldesa se esforza en crear deste encontro" e o resultado do mesmo. Confía en que o presidente e a alcaldesa "saiban ter altura de miras e deixar de lado intereses particulares", despois de que nos días previos, engadiu, "se sucederan declaracións pouco construtivas" entre ambas as administracións.