Contradicións da nova lei de benestar animal: onde poden e non poden entrar os cans
Farmacéuticos lembran que non poden entrar nas farmacias. Animalistas cren que a Xunta e os concellos teñen que "porse as pilas" para garantir a aplicación da nova lei estatal.
Por Europa Press / Redacción | SANTIAGO DE COMPOSTELA | 01/10/2023 | Actualizada ás 13:35
O Colexio oficial de Farmacéuticos de Pontevedra lembra que, a pesar da entrada en vigor da lei de benestar animal o venres, as farmacias non permiten a entrada de ningún animal, fóra dos cans de asistencia.
Segundo explica o colexio profesional, desde que está plenamente activada a nova lei, algúns despachos recibiron consultas de usuarios sobre o acceso das súas mascotas. A norma estatal permite aos titulares dos establecementos facilitar o acceso de animais ás súas instalacións, pero a mesma disposición matiza que debe terse en conta a regulación sobre saúde pública que depende doutras administracións, como a autonómica e a local.
A este respecto, en Galicia hai unha lei propia de ordenación farmacéutica que expresamente prohibe a entrada e permanencia de animais nestas oficinas --fóra dos xa mencionados cans de asistencia--.
Neste contexto, a presidenta do Colexio de Farmacéuticos de Pontevedra, Alba Soutelo, lembra que a lei galega "é de obrigada aplicación e, por tanto, os farmacéuticos non están facultados para decidir se permiten ou non o acceso" de mascotas, senón que está expresamente prohibido.
ANIMALISTAS
Por outra banda, a fundación animalista Franz Weber considera que a Xunta e os concellos deben "porse as pilas" para garantir a aplicación da normativa estatal, aínda que a lei autonómica de protección animal, do ano 2017, xa contemplaba algunhas destas medidas.
No entanto, este colectivo ve aínda "materias pendentes", como o desenvolvemento regulamentario da lei, o fin dos criadeiros ilegais e unha xestión "responsable" de colonias de gatos urbanas. Para isto último, a fundación solicita un traballo conxunto do Goberno galego e da Federación Galega de Municipios e Provincias (Fegamp).
O portavoz de Fundación Franz Weber, Rubén Pérez, carga contra a Xunta porque durante todo o proceso parlamentario da lei estatal viuna "máis preocupada por rebentar o articulado" que por "ofrecer solucións, experiencias ou actuacións para acabar cos malos tratos animais".
